Թուրքիայի խորհրդարանի հայ պատգամավորը խոսել է Հայոց ցեղասպանության մասին՝ զայրացնելով պատգամավորներին

Թուրքիայի խորհրդարանում զինծառայության մասին օրենքում փոփոխությունների շրջանականերում ելույթ է ունեցել երկրի քրդամետ Ժողովուրդների դեմոկրատական կուսակցության հայ պատգամավոր Կարո Փայլանն ու հանելով իր անձնագիրը՝ նշել է, որ դրանում նշված է իր քրիստոնյա լինելու հանգամանքը:

Ինչպես տեղեկացնում է թուրքական Ensonhaber կայքը, նա նշել է, որ այդ գրության պատճառով ինքը տասնյակ անգամներ խտրական վերաբերմունքի է արժանացել:

Խոսելով կրոնական խտրականության մասին՝ Փայլանը պատմել է, թե ցանկության դեպքում հնարավոր է բաց թողնել այդ գրությունը, սակայն այդ դեպքում էլ պետական աշխատողներն ասում են՝ «սա աթեիստ է», և դարձյալ խտրականություն է լինում:

«Ցեղասպանությունից հետո, երբ պապս փորձել է դարձյալ ոտքի կանգնել, նրա ունեցվածքը դարձյալ զավթել են: Ազգային խտրականությունը դեռ կա: Մեր պետության քաղաքացիները չպետք է կրոնական հարցերով զբաղվեն»,-ասել է նա:

Խոսքի ընթացքում «ցեղասպանություն» բառ օգտագործելը դուր չի եկել թուրք պատգամավորներին:

Ազգայնական շարժում կուսակցության պատգամավոր Էրքան Աքչայը ժխտել է ցեղասպանությունը: «Ցեղասպանությունն անգամ քննարկվել չի կարող: Այդ մասին դատական որոշում չկա: Դրանք Թուրքիայի թշնամիների ներկայացրած զրպարտանքներն են»,-ասել է պատգամավորը:

http://www.tert.am/am/news/2016/01/14/paylan-genocide/1898826