Էրդողանը խաղաղության կոչ անող թուրք եւ օտար գիտնականներին ու մտավորականներին անգրագետ է անվանել

Թուրքիայի նախագահ Ռեջեփ Թայիփ Էրդողանը երկրում քրդերի հետ խաղաղություն հաստատելու կոչ արած` Թուրքիայից եւ աշխարհի տարբեր երկրներից 1128 հայտնի գիտնականներին ու մտավորականներին անգրագետ է անվանել։

Ինչպես տեղեկացնում է Ստամբուլի հայկական «Ակօս»-ը, Թուրքիայի նախագահը խիստ է արձագանքել երկրում քրդերի դեմ իրականացվող գործողություններին վերջ տալու կոչ անող գիտնականներին ու մտավորականներին։

Էրդողանը ասել է, թե իրենց մտավորական անվանողների մի խումբ փորձում է Թուրքիային ինչ-որ բան ասել, սպառնալ տարածաշրջանի բնակչությանը։ «Թուրքիան նման գաղափարական դավաճանության հանդիպել է նաեւ 100 տարի առաջ։ Այդ գիտնականներն ու մտավորականները տեղներից վեր են կացել ու ասում են, թե պետությունը կոտորած է անում։ Դուք ի՞նչ մտավորական եք։ Դուք ոչ արեւելքի, ոչ էլ այս կողմերի հասցեները չգիտեք, դուք անգրագետ եք»,-ասել է Էրդողանը։

Նշենք, որ 1128 մտավորականի ու գիտնականի ստորագրությամբ հայտարարություն է հրապարակվել, որով թուրքական իշխանություններին կոչ է արվում դադարեցնել Սուրում, Ջիզրեում, Սիլոփիում ու Նուսայբինում փողոց դուրս գալու արգելքները, հրաժարվել քրդաբնակ շրջաններում բնակչության դեմ իրականացվող կոտորածի քաղաքականությունից, թույլ տալ հատուկ ստեղծվելիք դիտորդական հանձնաժողովների մուտքը հիշյալ շրջաններ եւ պայմաններ ստեղծել խաղաղության ու բանակցությունների համար։

http://news.am/arm/news/306134.html