Թուրքական իշխանությունների համոզմամբ՝ ահաբեկչության հետևում «Իսլամական պետությունն» է

Թուրքական իշխանությունները հայտարարել են, որ Ստամբուլի Սուլթանահմեթ հրապարակում տեղի ունեցած ահաբեկչությունը կարող է կազմակերպած լինել «Իսլամական պետություն» խմբավորումը։

Ինչպես տեղեկացնում է Reuters գործակալությունը, նման հայտարարություն են արել թուրքական պաշտպանության նախարարության երկու ներկայացուցիչ:

Նշվում է, որ իշխանություններն իրենց ուշադրությունը կենտրոնացրել են ԻՊ-ի մասնակցության վրա, քանի որ հարձակումն իրականացվել է զբոսաշրջային կենտրոնում՝ քաղաքացիական անձանց դեմ:

Թուրքիայի նախագահ Ռեջեփ Թայիփ Էրդողանը դեպքի առնչությամբ ելույթ է ունեցել՝ պնդելով, որ ահաբեկչի հետքերը տանում են Սիրիա։ Էրդողանը նաև հայտնել է, որ Թուրքիան տարածաշրջանում գործող ահաբեկչական խմբավորումների թիվ մեկ թիրախն է:

Նա նշել է, որ թուրքական իշխանությունները բոլոր ահաբեկիչների դեմ նույն կերպ են պայքարում։

Ստամբուլի կենտրոնական հրապարակներից Սուլթանահմեթում խոշոր պայթյուն է տեղի ունեցել: Պայթյունի հետևանքով զոհվել է 10 մարդ, ևս 15-ը վիրավորվել են։

http://www.tert.am/am/news/2016/01/12/isis/1896071