Օբաման կոչ է արել Էրդողանին դուրս բերել թուրքական զորքն Իրաքից

ԱՄՆ-ն Թուրքիայից ակնկալում է Իրաքից թուրքական զորքի դուրսբերում և հարգանք այդ երկրի ինքնիշխանության ու տարածքային ամբողջականության նկատմամբ։ Այդ մասին հայտնել է Սպիտակ տան մամուլի ծառայությունը` ԱՄՆ նախագահ Բարաք Օբամայի և իր թուրք գործընկեր Ռեջեփ Թայիփ Էրդողանի միջև հեռախոսազրույցի արդյունքների հիման վրա, գրում է ՏԱՍՍ գործակալությունը։

Նրանք քննարկել են Թուրքիայի և Իրաքի միջև առաջացած կոնֆլիկտը, որը կապված է թուրք զինվորականներին հարևան երկրի հյուսիս ուղարկելու հետ:

«ԱՄՆ նախագահը կոչ է արել նախագահ Էրդողանին լրացուցիչ քայլեր ձեռնարկել Իրաքի հետ լարվածության թուլացման նպատակով, այդ թվում` շարունակել թուրքական զորքերի դուրսբերումը»,- նշել են մամուլի ծառայությունում:

Երկու պետությունների առաջնորդները պայմանավորվել են շարունակել աշխատանքն այդ ուղղությամբ և համակարծիք են, որ ԱՄՆ-ն, Թուրքիան և Իրաքը պետք է ձեռնարկեն համատեղ ջանքեր` լարվածությունը նվազեցնելու և ԻՊ-ի դեմ պայքարում ռազմական գործողությունները համակարգելու նպատակով։

Իրաքի իշխանությունների տվյալներով՝ դեկտեմբերի 4-ին թուրք զինծառայողներն ու տեխնիկան մտել են Իրաքի Նայնավա նահանգ՝ «քուրդ աշխարհազորայիններին մարզելու նպատակով»։ Իրաքի պատկան մարմինները Թուրքիայի այդ քայլը «թշնամական գործողություն» են որակել։

http://www.tert.am/am/news/2015/12/19/obama/1879053