Ըստ թուրք պատմաբանի` Ռուսաստանը մտադիր է ընդունել ցեղասպանության հերքումը քրեականացնող օրինագիծը

Թուրքիայի Սամսուն նախանգի Իլքադըմ շրջանում «Հայերը և Հայկական հարցը պատմության մեջ» խորագրով հերթական ժխտողական սիմպոզիումն է անցկացվել:

Միջոցառմանը զեկույցով հանդես եկած Էրզրումի (Կարին-Ակունքի խմբ.) Աթաթուրքի համալսարանի նախկին դասախոս, դոկտոր, պրոֆեսոր Էնվեր Քոնուքչուն անդրադարձել է այս տարվա նոյեմբերի 25-ին, Հայոց ցեղասպանության հերքումը քրեականացնող օրինագիծը Ռուսաստանի խորհրդարանի օրակարգ բերելուն:

Թուրք պրոֆեսորը, իր խոսքում նշելով, որ շատ հաճախ Հայկական հարցը դառնում է քաղաքական շահարկումների առարկա, ասել է, որ թուրք-ռուսական ճգնաժամի պայմաններում Ռուսաստանը մտադիր է ընդունել վերոնշյալ օրինագիծը:

Ըստ թուրքական «Milliyet» թերթի կայքի` Հայոց ցեղասպանության իրողությունը հերքող Քոնուքչուն նշել է, որ եթե նույնիսկ եղել են կոտորածներ, ապա դրանց միակ մեղավորը Թուրքիան չէ:

Իր ելույթում բոլոր հնարավոր ու անհնար փաստարկումներով մերժելով Ցեղասպանությունը` թուրք պատմաբանը փորձել է ցույց տալ, թե «ինչքան անհիմն» կլինի Ռուսաստանի խորհրդարանի կողմից Հայոց ցեղասպանության մասին օրենքի հնարավոր ընդունումը:

Ermenihaber.am