Դիարբեքիրում բախումները շարունակվում են. թաղամասերը մարտադաշտի են վերածվել

Թուրքիայի Դիարբեքիր նահանգի Սուր շրջանում, որտեղ պարետային ժամ է հայտարարված, արդեն մի քանի օր է՝ բախումները շարունակվում են։

Ինչպես տեղեկացնում է Sondakika լրատվական կայքը, Դիարբեքիրում վիրավորվել է մեկ ոստիկան։ Նա վիրավորվել է պատմական Քուրշունլու մզկիթի մոտակայքում։

Այդպիսով՝ վիրավորված ոստիկանների թիվը հասել է 17-ի։ Կան զոհեր։

Փողոց դուրս գալու արգելքը պահպանվում է նաև Շըրնաք և Սիլոփի նահանգներում։ Այստեղ լռություն է տիրում, մարդիկ փողոց դուրս չեն գալիս, և փողոցներն ուրվական քաղաքների են վերածվել, գրում է կայքը։

Դիարբեքիրի շատ վայրեր լուրջ վնասներ են կրել։ Շրջանը, ականատեսների հավաստմամբ, մարտադաշտ է հիշեցնում։ Որոշ փողոցներում դեռ բարիկադներ են տեղադրված։ Շրջվել են էլեկտրասյուներ, ավերվել են ավտոբուսի կանգառները, աղբն ու քարերը չորս կողմում են թափված։

Երեկ այստեղ լուրջ բախումներ են գրանցվել։ Չնայած հայտարարված պարետային ժամին՝ քրդամետ կուսակցությունների կոչով բազմաթիվ մարդիկ դուրս են եկել բողոքի ցույցի։ Ոստիկանությունը դիմադրել է, ինչի հետևանքով շրջանը լուրջ վնասներ է կրել։ Այսօր առավոտյան տներից դուրս եկող մարդիկ պատերազմական տեսարաններ հիշեցնող պատկերների ականատես են եղել։

http://www.tert.am/am/news/2015/12/15/diyarbekir/1874928