Ռուսաստանը Թուրքիային մեղադրել է ԼՂ հարցում Ադրբեջանին սատարելու, «ապակառուցողական» քայլերի համար

Ռուսաստանյան առաջատար լրատվամիջոցները հայտնում են ԵԱՀԿ-ում Ռուսաստանի մշտական ներկայացուցիչ Ալեքսանդր Լուկաշևիչի հայտարարության մասին՝ Լեռնային Ղարաբաղի առնչությամբ:

Ըստ «ՌԻԱ Նովոստի»-ի՝ «Ռոսսիյա 24»-ի եթերում Լուկաշևիչը հայտարարել է, որ Լեռնային Ղարաբաղի հարցով Թուրքիայի հայտարարությունները «դեստրուկտիվ» են՝ նկատի ունենալով Անկարայից ավելի վաղ հնչած հայտարարությունը, թե Թուրքիան ամեն ինչ կանի Ադրբեջանին ԼՂ-ն վերադարձնելու համար:

«ԵԱՀԿ-ում նման դիրքորոշմանը չեն աջակցում: Կա խիստ գիտակցումը, որ երեք համանախագահները՝ Ռուսաստանը, Ֆրանսիան, ԱՄՆ-ն, կրում են հիմնական ծանրաբեռնվածությունը, ճիշտ ինչպես Մինսկի խմբի անդամները՝ որպես այդպիսին՝ հավասարապես: Բայց առաջատար դերը վերապահված է, և դա ընդունվում է, երեք համանախագահներին: Ուստի՝ Լեռնային Ղարաբաղում հակամարտության կողմերից մեկին պաշտպանելու փորձերը դեստրուկտիվ են և որևէ շարունակություն ունենալ չեն կարող», – մասնավորապես ասել է Լուկաշևիչը, երբ նրան խնդրել են մեկնաբանել Անկարայի հայտարարությունները:

ՏԱՍՍ-ի փոխանցմամբ էլ՝ Լուկաշևիչը հավելել է նաև, որ դեկտեմբերին Սարգսյան-Ալիև սպասվող հանդիպումը «կառուցողական ներդրում կունենա լարվածության թուլացման գործում»:

Լուկաշևիչի հայտարարությանը արձագանքել է նաև ադրբեջանկան մամուլը. Haqqin.az-ը նկատում է, որ սա Ռուսաստանի կողմից մեղադրանք է Թուրքիային՝ ԼՂ հարցում Ադրբեջանին սատարելու համար:

http://www.tert.am/am/news/2015/12/14/Tr-ru-az/1874192