Թուրքիայում մեկնարկել է «Վանա լիճ» կինոփառատոնը

Դեկտեմբերի 6-ին Թուրքիայում մեկնարկել է «Վանա լիճ» միջազգային 4-րդ կինոփառատոնը: Մինչ այժմ այն անցկացվել սեպտեմբերի առաջին օրերին և համընկել սեպտեմբերի 6-ին նշվող Աղթամար կղզու Սուրբ Խաչ եկեղեցուն նվիրված օրվա հետ:

Փառատոնի գլխավոր խորհրդական Րաֆֆի Հերմոն Արաքսի խոսքով` կազմակերպիչներն այս տարի ստիպված են եղել տեղափոխել փառատոնի անցկացման օրերը` պայմանավորված տարածաշրջանում քաղաքական լարված իրավիճակով:

«Վանա լիճ» միջազգային 4-րդ փառատոնը նվիրված է Հայոց ցեղասպանության 100-րդ տարելիցին: Այն անցկացվում է «Առերեսվելով մշակութային ժառանգությանը» խորագրի ներքո: Հայաստանը փառատոնի հյուր երկիրն է:

Փառատոնին մասնակցում են ֆիլմեր ԱՄՆ-ից, Իրանից, Թուրքիայից և Հայաստանից: Ծրագրում ներառված է 11-ական խաղարկային և վավերագրական ֆիլմ, այդ թվում` Կարին Հովհաննիսյանի և Ալեք Մուհիբյանի «1915» լիամետրաժը, իրանցի Սալեմ Սալավաթիի «Անցած ձմեռը», որը 2013-ին մասնակցել է «Ոսկե ծիրան» կինոփառատոնին, քուրդ ռեժիսոր Էրոլ Մինթաշի «Մորս երգը» ֆիլմը, որն այս տարի մասնակցել է Մոսկվայի միջազգային կինոփառատոնին և այլն:

Վավերագրական ֆիլմերի ծրագրում ներկայացված է հայ ռեժիսոր Արմեն Գասպարյանի «Գողացված մանկություն» ֆիլմը:

Խաղարկային ֆիլմերի մրցույթի ժյուրին այս տարի նախագահում է դերասան Ֆիլիզ Կուտլարը, վավերագրական մրցույթի ժյուրիի նախագահ է ընտրվել վիդեոարտիստ Օզգե Չելիկասլանը:

Փառատոնի մրցանակը «Մարգարտե տառեխն» է, որը խորհրդանշում է Վանա լճի էնդեմիկ ձկնատեսակը: Փակումը տեղի կունենա դեկտեմբերի 12-ին:

http://civilnet.am/2015/12/07/van-lake-film-festival-turkey/#.VmqOAdKyOko