ԶԼՄ-ներն Էրդողանի որդուն «ԻՊ-ի նավթի նախարար» են անվանել

Արտասահմանյան որոշ ԶԼՄ-ներ անդրադարձել են Թուրքիայի նախագահ Ռեջեփ Թայիփ Էրդողանի որդուն` Բիլալ Էրդողանին` նշելով, որ վերջինիս կենսագրությունում բազում մութ դրվագներ կան։

Մասնավորապես՝ գերմանական Handelsblatt պարբերականի փոխանցմամբ՝ Բիլալ Էրդողանն «Իսլամական պետություն» ահաբեկչական խմբավորման գրոհայիններից գնել է Իրաքի գրավյալ տարածքներից արդյունահանված նավթն ու այն վաճառել ասիական պետություններին։ Նման գործունեության հետևանքով Բիլալ Էրդողանն Իրաքում ստացել է «ԻՊ-ի նավթի նախարար» մականունը:

Ինչպես նշում է vz.ru-ն, գերմանական պարբերականը հիշեցնում է նաև 2014թ. սկզբին ի հայտ եկած հեռախոսային ձայնագրության մասին, որում Բիլալ Էրդողանը խոսում է 10 մլն դոլար ստանալու մասին: Թեև հստակ պարզ չէ, թե այդ գումարն ով պետք է վճարեր նրան, այնուհանդերձ, ենթադրվում է, որ խոսքը վերաբերում է ԻՊ-ից գնված նավթի տեղափոխման համար նավթատար խողովակաշարի կառուցմանը:

Բացի այդ, Handelsblatt-ը տեղեկություններ ունի առ այն, որ Բիլալ Էրդողանը 2013թ. զբաղվել է հոր` այն ժամանակ դեռ երկրի վարչապետի փողերի լվացմամբ: Ըստ գերմանական աղբյուրի՝ այս մեղադրանքն ապացուցող լուսանկարներ, հեռախոսազրույցների ձայնագրություններ և այլ փաստաթղթեր կան։

http://www.tert.am/am/news/2015/12/07/erdoghans-son/1866926