Վերջին 11 տարվա ընթացքում առաջին երկկողմ գագաթաժողովին, որը կայացել է նոյեմբերի 29-ին Բրյուսելում, Եվրամիությունն ու Թուրքիան համաձայնեցրել են միգրացիոն ճգնաժամի հաղթահարման պլան, որի դիմաց Անկարան կստանա 3 մլրդ եվրո:
Ինչպես գրում է Hurriyet Daily News-ը, Թուրքիան կօգնի կանգնեցնել ներգաղթյալների հոսքը դեպի Եվրոպա՝ փողի, ԵՄ-ի հետ այցագրային ռեժիմի ազատականացման և անդամակցության բանակցությունների վերսկսման դիմաց:
Եզրափակիչ մամուլի ասուլիսին ԵՄ-ի առաջնորդները հայտարարել են, որ Բրյուսելն ու Անկարան որոշել են նոր փուլ բացել Թուրքիայի՝ Միությանն անդամակցության գործընթացում:
«Մենք ընդունել ենք գործողությունների համատեղ պլան՝ դեպի Եվրոպա ներգաղթյալների հոսքը կանգնեցնելու նպատակով»,- հայտարարել է Եվրոպական Խորհրդի նախագահ Դոնալդ Տուսկը՝ նշելով, որ 3 մլրդ եվրոյի օժանդակություն է տրամադրվելու Թուրքիայում սիրիացի փախստականներին, ինչին ի պատասխան Դավութօղլուն ասել է, որ գումարը ծախսվելու է փախստականների կարիքների և ոչ թե Թուրքիայի վրա:
«Այսօր պատմական օր է Եվրամիությանն անդամակցելու գործընթացի տեսանկյունից»,- հայտարարել է Թուրքիայի վարչապետ Ահմեդ Դավութօղլուն:
Վերջինս շեշտել է, որ Թուրքիան ձգտում է օգնել, սակայն չի կարող խոստումներ տալ:
«Կցանկանայի ասել՝ ներգաղթյալների թիվը կնվազի, սակայն չենք կարող դա ասել, քանի որ չգիտենք՝ ինչ կլինի Սիրիայում»,- Associated Press-ի փոխանցմամբ՝ նշել է Թուրքիայի վարչապետը ու խոստացել, այդուհանդերձ, աշխատել սահմանների ուժեղացման ուղղությամբ և պայքարել ներգաղթյալների մաքսանենգ ճանապարհով տեղափոխման դեմ:
Եվրահանձնաժողովի նախագահ Ժան Կլոդ Յունկերն իր հերթին նկատել է, որ գումարը հենց այնպես չէ փոխանցվելու Անկարային. Բրյուսելն ուշադիր է հետևելու և վերահսկելու է 3 մլրդ եվրոյի ծախսը:
Դավութօղլուն նաև տեղեկացրել է, որ ամեն տարի երկու անգամ անցկացվելու է գագաթաժողով, ինչի շնորհիվ արագացվելու է Թուրքիայի՝ ԵՄ-ին անդամակցության գործընթացը:
Գագաթաժողովից առաջ ԵՄ-ի նախապատրաստած փաստաթղթում ասված է, որ դեկտեմբերի 14-ին բացվելու է բանակցությունների 17-րդ գլուխը, որը վերաբերում է տնտեսական և դրամավարկային քաղաքականությանը:
***
Թուրքիան ԵՄ-ի հետ անդամակցության բանակցությունները սկսել է 2005թ. հոկտեմբերի 3-ին, մինչդեռ ԵՄ-ին անդամակցելու դիմում է ներկայացրել 1987թ.: Քաղաքական մի շարք խոչընդոտներ, մասնավորապես, Կիպրոսի հարցը և Թուրքիայի անդամակցությանն ընդդիմացող Գերմանիայի և Ֆրանսիայի բացասական դիրքորոշումը, արգելակել են բանակցային գործընթացը: Բանակցային 33 գլուխներից բացվել է 14-ը:
Նոյեմբերի 10-ին հրապարակվել է Եվրոպական Միության՝ Թուրքիայի վերաբերյալ Առաջընթացի զեկույցը, որը, հակառակ Անկարայի ակնկալիքներին, արձանագրել է երկրում բարեփոխումների գործընթացի դանդաղում:
Նոյեմբերի 11-ին Անկարայում Եվրահանձնաժողովի առաջին փոխնախագահ Ֆրանս Տիմերմանսի հետ հանդիպմանը Թուրքիայի վարչապետ Ահմեդ Դավութօղլուն հայտարարել էր, որ Թուրքիայի նոր կառավարության թիվ մեկ գերակայություններից է լինելու լիիրավ անդամակցությունը Եվրամիությանը:
http://civilnet.am/2015/11/30/ankara-eu-summit-3-bln-euro-migrants-accession/#.VlwcQtLhBkg
Leave a Reply