Թուրքիոյ նոր կառավարութեան ծրագիրին մէջ պահպանուած են Հայաստանի նկատմամբ հին մօտեցումները

Թուրքիոյ վարչապետ Ահմեթ Տաւութօղլուի կողմէ յայտարարուած 64-րդ կառավարութեան ծրագիրը որեւէ փոփոխութիւն չի բովանդակեր Հայաստանի հետ յարաբերութիւններուն առնչութեամբ թրքական կողմի մօտեցումներուն մէջ: Ըստ Armenpress.am-ի փոխանցած տեղեկութիւններուն՝ կառավարութեան նոր ծրագիրին մէջ ներկայացուած են հայ-թրքական յարաբերութիւններու կարգաւորման այն կէտերը, զորս որդեգրած էին Թուրքիոյ նախկին կառավարութիւնները:

Կառավարութեան ծրագիրին մէջ Հայաստանի հետ յարաբերութիւններուն մասին կ՛ըսուի. «Յառաջիկային պիտի շարունակուին Հայաստանի հետ յարաբերութիւններու կարգաւորման ուղղուած մեր քայլերը»: Թուրքիոյ իշխանութիւնները դարձեալ նշած են «արդար յիշողութեան փնտռտուքներուն մէջ պատմութիւնը ուսումնասիրելու» անհրաժեշտութիւնը` աւելցնելով, թէ միայն այդ ձեւով կարելի է Կովկասի մէջ հաստատել խաղաղութիւն, կայունութիւն եւ բարգաւաճում:

Նոր ծրագիրին մէջ Տաւութօղլուի գլխաւորած կառավարութիւնը չէ մոռցած նաեւ «կրտսեր եղբայր»-ը` Ազրպէյճանը: Մասնաւորաբար ընդգծուած է, որ Թուրքիան պիտի շարունակէ ջանքեր գործադրել «Լեռնային Ղարաբաղի բռնագրաւման վերջ տալու» եւ «հայ-ազրպէյճանական յարաբերութիւններուն մէջ գոյութիւն ունեցող լարուածութիւնը թօթափելու»:

http://www.yerakouyn.com/?p=94490