Էրդողանն ագրեսիա կհամարի Սիրիայի սահմանը խախտելիս թուրքական ինքնաթիռի վրա հարձակումը

Թուրքիայի նախագահ Ռեջեփ Թայիփ Էրդողանը CNN հեռուստաալիքին տված հարցազրույցում հայտարարել է, որ Անկարան որպես ագրեսիա կգնահատի իրավիճակը, երբ նրա մարտական ինքնաթիռը խախտի Սիրիայի օդային տարածքը և ոչնչացվի ռուսական զենիթահրթիռային համալիրի օգնությամբ։

Թուրքիայի նախագահն այդպես է պատասխանել լրագրողի հարցին, թե ինչպես Անկարան կարձագանքի այն դեպքում, եթե թուրքական մարտական ինքնաթիռը խախտի Սիրիայի օդային տարածքը և դրանից հետո կործանվի С-400 համակարգի օգնությամբ։

«Մենք չենք ցանկանում տարածաշրջանում լարվածության աճ տեսնել։ Մենք չենք ցանկանում դրան մասնակցել: Բայց նրանք, ովքեր կանգնում են Սիրիայի կողքին և աջակցում լարվածության աճին, կարծում եմ՝ դրա համար պատասխանատվություն են կրում»,- ասել է նա։

Նրա խոսքով՝ նման միջադեպը հնարավոր է, և «այն կստիպի մեզ ձեռնարկել հետագա միջոցներ, որոնք անշուշտ չեն քննարկվում»։

Հիշեցնենք, որ նոյեմբերի 24-ին թուրքական օդուժի կողմից խոցվել է ռուսական Սու-24 ինքնաթիռը։ ՌԴ նախագահ Վլադիմիր Պուտինն ավելի վաղ հայտարարել էր, որ ինքնաթիռը խփվել է թուրքական F-16 կործանիչից արձակված «օդ-օդ» տիպի հրթիռով և ընկել Սիրիայի տարածքում՝ Թուրքիայի սահմանից 4 կմ հեռու։ Ռուսաստանի նախագահը տեղի ունեցածը «թիկունքից հարված» էր որակել, որն արվել է հօգուտ ահաբեկիչների։

http://www.tert.am/am/news/2015/11/27/erdoghan/1857271