Կրեմլից հայտնել են Թուրքիայի նկատմամբ խիստ միջոցառումներ ձեռնարկելու հնարավորության մասին. Коммерсантъ

Ռուսաստանը պատրաստ է կասեցնել համատեղ բիզնես նախագծերն ու հրաժարվել Թուրքիայի հետ ռազմական համագործակցությունից՝ ռուսական օդուժին պատկանող Սու-24-ի խոցման պատճառով: Այդ մասին գրում է «Коммерсантъ»-ը՝ պետական կառույցների բարձրաստիճան պաշտոնյաների հղումով։

Նախագահի աշխատակազմից պարբերականին հայտնել են, որ Անկարայի հետ հարաբերությունների վերաբերյալ վճիռը խիստ է լինելու և շատ ոլորտներում լուրջ ազդեցություն է ունենալու ռուս-թուրքական հարաբերությունների վրա:

Աղբյուրի խոսքով՝ «Գազպրոմ» էներգետիկ ընկերությունը գնահատական կտա «Թուրքական հոսք» նախագծի նպատակահարմարությանը: Բացի այդ, սպառնալիքի տակ կարող է հայտնվել երկու երկրների միջև կնքված համաձայնագիրը՝ Թուրքիայում ատոմակայան կառուցելու վերաբերյալ: Այդ գործարքի արժեքը 22 մլրդ դոլար է գնահատվել:

Թուրքիան, ինչպես նշում է պարբերականը, կարող է սահմանափակել ռուսական նավերի մուտքը Բոսֆորի ու Դարդանելի նեղուցներ, ինչը, մասնավորապես, կազդի Սիրիայի Հմեյմիմ ավիաբազան զինելու վրա:

Սակայն համաձայն Մոնտրեի` 1936 թվականի կոնվենցիայի, որը կարգավորում է նեղուցներով անցնելու ռեժիմը, Անկարան այդ քայլին կարող է գնալ միայն՝ եթե համարի, որ իրեն պատերազմ է սպառնում:

Սակայն անգամ այդ դեպքում թեկուզ որոշակի սահմանափակումներով, սակայն առևտրային նպատակներով նավերը կարող են անցնել:

Լիակատար արգելք Թուրքիան կարող է սահմանել միայն այն դեպքում, երբ ինքը ներքաշվի պատերազմի մեջ։

Հիշեցնենք, որ երեկ ռուսական ռազմական ինքնաթիռը կործանվել էր Սիրիայում։ ՌԴ նախագահ Վլադիմիր Պուտինը հայտարարել էր, որ ինքնաթիռը խփվել է թուրքական F-16 կործանիչից արձակված «օդ-օդ» տիպի հրթիռով և ընկել Սիրիայի տարածքում՝ Թուրքիայի սահմանից 4 կմ հեռու։ Ռուսաստանի նախագահը տեղի ունեցածը «թիկունքից հարված» էր որակել, որն արվել է հօգուտ ահաբեկիչների։

http://www.tert.am/am/news/2015/11/25/kremlin-turkey/1854931