Պոլսահայ աշխարհառչակ լուսանկարիչ Արա Գյուլերն իր 70-ամյա ֆոտոարխիվը բոլոր հեղինակային իրավունքներով հանձնել է իշխանություններին մոտ գտնվող «Դողուշ» հոլդինգին։ Այս մասին տեղեկացնում է թուրքական Sözcü պարբերականը:
Արա Գյուլերը, ըստ կատարված գործարքի, ամսական ստանալու է 50 հազար լիրա։ Բացի այդ, «Դողուշ» հոլդինգին են անցնելու այն շենքը, որում գտնվում է Ara Kafe-ն եւ Արա Գյուլերի լուսանկարչական ապարատների հավաքածուները։
Նշվում է, որ Արա Գյուլերի արխիվն ու մյուս միջոցները շահագործելու համար «Դողուշ» հոլդինգը ստեղծելու է հատուկ ընկերություն, որի բաժնետոմսերի 40 տոկոսը կլինի Արա Գյուլերի սեփականությունը։ Արա Գյուլերի արխիվը մասնագետների կողմից գնահատվում է 3 մլն եվրո:
Փաստենք` Արա Գյուլերի արխիվը չհանձնվեց Պոլսո պատրիարքարանին, ամբողջովին կամ մասամբ այն չժառանգեց հայ համայնքը ներկայացնող համայնքային կառույց, այն, գոնե մասամբ, չնվիրաբերվեց Հայաստանին:
Պոլսահայության մշակութային արժեքավոր ժառանգությունն ամբողջովին անցավ կիսապետական կառույցի: Կարող էր այդ ժառագության մի մասն անցնել Հայաստանին:
Կարող էր, բայց ինքներս հրաժարվեցինք:
2013 թվականի հունիսին Հայաստանի ազգային պատկերասրահում բացվել էր «Բարև ձեզ» խորագիրը կրող ցուցահանդեսը, որը ներառում էր աշխարհի տարբեր անկյուններում և տարբեր ժամանակներում արված ավելի քան 100 աշխատանք: Վարպետն անձամբ էր ժամանել Հայաստան և անգամ հյուրընկալվել էր նախագահ Սերժ Սարգսյանի կողմից:
Այդ օրերին տարբեր առիթներով Արա Գյուլերը կրկին ցանկություն էր հայտնել, որ Հայաստանում բացվի նրան տուն-թանգարանը, ուր կտեղակայվեր վարպետի արխիվի հայկական թեմայով հատվածը: Չեղավ արձագանք, ոչ ոք չհանձնառեց այդ գործը, լավ իմանալով, որ Արա Գյուլերը, 87-ամյա ծերունին, Աստծո կամոք շտապում է և մտահոգ է իր ժառանգության ճակատագրով:
Հիշեցնենք, որ դեռևս 2004-ին Արա Գյուլերն իր հավաքածուի «Հայաստան», «Թուրքիա» շարքերը, որոնք ցուցադրվեցին Հայաստանում, նվիրել էր հայությանը` հույս ունենալով, որ թանգարան կբացվի:
Այդ Արա Գյուլերն իր ժառանգությունը չհանձնեց թուրքերին. այդ մենք հրաժարվեցինք նրա ժառանգության` հայկական թեմայով հատվածից:
http://www.armweeklynews.am/n/na/10/a108.php
Leave a Reply