Թուրքիայում քրդամետ կուսակցապետի դեմ մահափորձ է իրականացվել

Թուրքիայում մահափորձ է իրականացվել քրդամետ ընդդիմադիր Ժողովուրդների դեմոկրատական կուսակցության (ԺԴԿ-HDP) համանախագահ Սելահաթթին Դեմիրթաշի նկատմամբ:

Թուրքական «Evrensel.net» լրատվակայքի տեղեկացմամբ՝ նոյեմբերի 22-ի երեկոյան Դիարբեքիրում անհայտ անձը կրակել է Դեմիրթաշի ծառայողական ավտոմեքենայի վրա այն ժամանակ, երբ կուսակցապետը գտնվելիս է եղել մեքենայում:

Լրատվամիջոցների հետ զրույցում Դեմիրթաշը նշել է, որ կրակոցի ձայնը կամ որևէ աղմուկ իրենք չեն լսել, բայց երբ մեքենայից իջել են, թիկնապահները մեքենայի զրահապատ հետնապակու վրա փամփուշտի հետք են նկատել: Դատելով փամփուշտի՝ ապակու վրա նշմարված հետքի դիրքից՝ կրակոցն ուղղված է եղել ուղևորի գլխին:

Մահափորձից հետո ԺԴԿ առաջնորդը Twitter-ում քրդերենով հետևյալ գրառումն է արել. «Մահն Աստծո հրամանով է»:

Ermenihaber.am