Թուրքիայում հայկական եկեղեցին վերածվել է ստվարաթղթի պահեստի

Թուրքիայի Իզմիր նահանգի Բայընդըր շրջանում գտնվող հայկական եկեղեցին վերանորոգումից հետո վերածվել է պահեստի։

Թուրքական “Yeni Asır” լրատվական կայքի տեղեկացմամբ՝ իշխող Արդարություն և արգացում կուսակցության` (AKP-ԱԶԿ) Բայընդըրի շրջանային կառույցի նախագահ Ուղուր Դեմիրեզենը պնդում է, որ հայկական եկեղեցին պահեստի է վերածել հենց շրջանային իշխանությունը։ Իսկ այդ շրջանային իշխանության ղեկավարն ընդդիմադիր ճամբարը ներկայացնող Ժողովրդահանրապետական կուսակցության անդամ Ուֆուք Սելսին է:

«Նրանք մշակույթի կենտրոն բացելու փոխարեն եկեղեցին վերածել են ստվարաթղթի պահեստի»,-Ermenihaber.am-ի փոխանցմամբ՝ ընդգծել է Դեմիրեզենը: Վերջինս նաև հավելել է, որ 1857-ինն կառուցված այդ եկեղեցին հանրապետության հռչակումից հետո վերածվել էր կինոթատրոնի։ 2010թ. Իզմիրի նահանգապետարանն ու Թուրքիայի մշակույթի և զբոսաշրջության նախարարությունը վերանորոգել են եկեղեցին որպես մշակույթի կենտրոն օգտագործելու նպատակով։

Եկեղեցու վերանորոգման համար ծախսվել է 1 միլիոն թուրքական լիրա (մոտ 350.000 դոլար), իսկ վերանորգման աշխատանքներն իրականացվել են Բայընդըրի գավառ նախկին նախագահ Մեհմեթ Քերթիշի ջանքերով, որն իշխող կուսակցության ներկայացուցիչ է։

Hayernaysor.am