ՊԱՔՈՒ.- Թուրքիոյ ցամաքային ուժերու հրամանատար զօր. Սալիհ Զեքի Չոլաք, որ պաշտօնական այցով կը գտնուի Պաքու, հանդիպում մը ունեցած է Ատրպէյճանի պաշտպանութեան նախարար Զաքիր Հասանովի հետ:
Ըստ թրքական «TRThaber» լրատուամիջոցին՝ կողմերը խօսած են թուրք-ատրպէյճանական ռազմական յարաբերութիւններուն, ինչպէս նաեւ ՆԱԹՕի շրջանակներէն ներս այդ կապերու զարգացման վերաբերող հարցերու մասին: Կողմերը անդրադարձած են նաեւ տարածաշրջանի ռազմական եւ քաղաքական իրադրութեան:
«Խոր ուսումնասիրելով պատմութիւնը՝ մենք պէտք է դասեր քաղենք: Պէտք է միասին ըլլանք, որպէսզի զօրաւոր մնանք», նշած է թուրք զօրավարը՝ փափաք յայտնելով աւելի եւս սերտացնելու երկու երկիրներուն միջեւ զինուորական կապերը։
Իր կարգին, Հասանով յոյս յայտնած է, որ ՆԱԹՕի ծիրէն ներս թուրք-ատրպէյճանական ռազմական համագործակցութիւնը կ՛ընդարձակուի: Ան նաեւ յոյժ կարեւոր նկատած է յաճախակիօրէն կազմակերպուող թուրք-ատրպէյճանական օդային եւ ցամաքային ուժերու զօրավարժութիւնները:
Ի դէպ, ասիկա Սալիհ Զեքի Չոլաքի առաջին պաշտօնական այցն է Պաքու՝ ցամաքային ուժերու հրամանատար նշանակուելէն ետք։
Asbarez.com
Leave a Reply