Սթամպուլի նախկին հայկական գերեզմանոցի տարածքին մարդկային ոսկորներ գտնուած են

Սթամպուլի կեդրոնական Թաքսիմ հրապարակին վրայ կատարուող վերակառուցման աշխատանքներուն ընթացքին մարդու գանկի մնացորդներ եւ այլ ոսկրակտորներ գտնուած են: Թրքական «Haberler.com» կայքի հաղորդած տեղեկութիւններով` կ’ենթադրուի, որ այդ ոսկորները կը պատկանին հայերուն, քանի որ այդ տարածքին մէջ մինչեւ 1939թ. հայկական գերեզմանոց եղած է։ Այս մասին կը գրէ Ermenihaber.am-ը:

Հայկական աղբիւրներուն յղում կատարող թրքական կայքը կ’ընդգծէ, որ գերեզմանոցի տարածքը հայկական համայնքին տրուած էր շնորհիւ սուլթան Սուլէյմանի վանեցի խոհարար Մանուկ Քարասեֆերեանի, որ սուլթանին անգամ մը փրկած էր թունաւորուելէ:

1853թ. օսմանեան սուլթան Ապտուլ Մէճիտի հրամանագիրով հայկական գերեզմանոցի շուրջը քարէ պարիսպ կառուցուած էր: Ապա Ֆրանսան եւ Սարտինիոյ թագաւորութիւնը (Իտալիան) գնած էին Թաքսիմի շրջանի որոշ հողակտորներ եւ այնտեղ յուղարկաւորած Ղրիմի պատերազմին զոհուած իրենց զինուորները:

1865թ. Սթամպուլի մէջ սկիզբ առած քոլերայի համաճարակը տարածուած էր ոչ միայն ժողովուրդին մէջ, այլ վարակած անգամ որոշ պալատականներու: Այդ պատճառով ձմեռնային պալատի մօտակայքը գտնուող հայկական գերեզմանոցին մէջ հանգուցեալներու յուղարկաւորութիւնը արդէն արգիլուած էր: Հայերուն եւ յոյներուն գերեզմանոցի համար հողատարածք յատկացուած էր Սթամպուլի Շիշլի թաղամասին մէջ, որ խիտ բնակեցուած չէր: Այդ գերեզմանոցը կ’օգտագործուի նաեւ այսօր:

Թաքսիմի հայկական գերեզմանոցի տարածքէն մաս մը սուլթան Ապտուլ Ազիզի հրամանով բռնագրաւուած է 1870թ, երբ տարածքին մէջ բարեկարգման աշխատանքներ կ’իրականացուէին: Իսկ ամբողջութեամբ տարածքը օտարուած էր 1939թ.: Իսկ 1940-ին Սթամպուլի նահանգապետ եւ քաղաքապետ Լիւթֆի Քըրտար հաստատած էր գերեզմանոցի տեղը ներկայիս Կեզի զբօսայգիի եւ Թաքսիմի տարածքի շարք մը բնակելի շէնքերու կառուցման ծրագիրը:

http://www.yerakouyn.com/?p=93794