Դինքի սպանության պահին ժանդարմերիան ներկա է եղել ու հետեւել հանցանքին․ դատախազություն

Հրանտ Դինքի սպանության պահին տարածքում ներկա են եղել Տրապիզոնի ժանդարմերիայի հետախուզության գործակալները, ովքեր համագործակցել են սպանությունն իրականացրած Օգյուն Սամասթի հետ։ Նման տողեր են գրված Դինքի սպանության գործով մեղադրական զեկույցը` գործը քննող դատախազին հետ տված գլխավոր դատախազության հայտարարության մեջ։

Ինչպես տեղեկացնում է թուրքական BirGün պարբերականը, Հրանտ Դինքի սպանության գործով մեղադրական զեկույցը երկրորդ անգամ գործը քննող դատախազ Գյոքալփ Քյոքչուին վերադարձնելը լուրջ խմորումներ է առաջացրել դատական համակարգում։ Գլխավոր դատախազությունը մեղադրական զեկույցը հետ վերադաձնելը պատճառաբանել է այն հանգամանքով, որ տեսագրությունների մեջ Դինքի սպանության պահին տարածքում են եղել կասկածելի դեմքեր, ովքեր, ինչպես ավելի ուշ պարզվել է, հանդիսացել են Տրապիզոնի եւ Ստամբուլի ժանդարմերիայի հետախուզության գործակալները։ Հիշյալ գործակալները համագործակցել ու հետեւել են Օգյուն Սամասթին՝ Հրանտ Դինքին սպանելու համար։

Դինքի ընտանիքի փաստաբաններից Հաքան Բաքըրջըօղլուն նշել է, թե գլխավոր դատախազությունը հետ է վերադարձնում մեղադրական զեկույցը՝ ստիպելով երեք կարեւոր պաշտոնյաների վրայից հանել մեղադրանքները։ Նա շեշտել է․ թե ներկայում Դինքի գործը քննող դատախազ Գյոքալփ Քյոքչուն գործը լավ է քննում, եւ անհրաժեշտ է, որ նա էլ ավարտին հասցնի գործը։ Փաստաբանը պնդել է, թե հիշյալ դատախազի դեմ գլխավոր դատախազությունը բողոքել է Դատավորների եւ դատախազների բարձրագույն խորհրդին։

http://news.am/arm/news/296044.html