Անկարայում Հայոց ցեղասպանության մասին պատմող ցուցահանդեսը անհանգստացրել է թուրքերին

Անկարա նահանգի Չանքայայի քաղաքապետարանի կողմից Ժամանակակից արվեստների կենտրոնում հայ ընտանիքի մասին պատմող ֆոտոպատմություն-ցուցահանդեսը խիստ անհանգստացրել է ազգայնական շրջանակներին։

Թուրքական Memurlar.net կայքը նշել է, թե մի հայ ընտանիքի մասին պատմող ֆոտոցուցահանդեսն իրականում Հայոց ցեղասպանության մասին է պատմում, ինչն էլ անհանգստացրել է հասարակությանը։

Կայքն անհանգստությամբ նշել է, թե Հայոց ցեղասպանության մասին պատմող ցուցահանդեսի բացումը տեղի է ունեցել Ժողովրդահանրապետական կուսակցության փոխնախագահ Սեզգին Թանրըքուլուի, կուսակցության նախկին պատգամավոր Աթիլլա Քարթի, պրոֆ. Բասքըն Օրանի եւ Մշակույթի եւ տուրիզմի նախկին նախարար Էրթուղրուլ Գյունայի մասնակցությամբ։

Իսկ ահա թուրքական Evrensel-ը հիշյալ ցուցահանդեսն այլ տեսանկյունից է ներկայացրել՝ նշելով Ցոլակ եւ Արամ Դիլդիլյան եղբայրների ընտանիքի ֆոտոպատմության կարեւորությունը։

Evrensel-ը նշել է, թե ֆոտոցուցահանդեսը պատմում է Ցեղասպանության, տեղահանության եւ հայ համայնքի կառույցի մասին 1872-1973 թվականներին։
«Մի հայ ընտանիքի կորած անցյալի ականատեսները» ֆոտոցուցահանդեսը շարունակվելու է մինչեւ նոյեմբերի 22-ը։

http://news.am/arm/news/295838.html