Թեհրանում կայացել է Ցեղասպանության մասին «Անիծյալ տարիներ» գրքի պարսկերեն թարգմանության շնորհանդեսը

Իրանահայ ժողովրդավարական ուժերի համադրող մարմնի նախաձեռնությամբ Հայոց ցեղասպանության 100-րդ տարելիցին նվիրված միջոցառումների շրջանակում նոյեմբերի 7-ին Թեհրանում կայացել է արևմտահայ գրող-երգիծաբան Երվանդ Օտյանի «Անիծյալ տարիներ» գրքի պարսկերեն թարգմանության շնորհանդեսը: Այս մասին «Հայերն այսօրի» փոխանցմամբ՝ հայտնում է իրանահայ «Արաքս» գրական-մշակութային պարբերականը: Իրանահայ համայնքում աննախադեպ այս միջոցառմանը ներկա են եղել իրանցի և իրանահայ հայտնի գրականագետներ, գրողներ:
«Անիծյալ տարիներ» (1918—1919) հուշագրությունների գիրքը հրատարակվել է 1100 տպաքանակով, պարսկերեն է թարգմանվել իրանահայ թարգմանիչ Անդրանիկ Խեչումյանի կողմից:
«Հայոց ցեղասպանությունը այսօր ևս շարունակվում է, միայն թե այլ տեսքով՝ մշակութային և պատմական ժառանգությունների ավերումով, հայկական հետքերը մաքրելով»,- ասել է միջոցառման բանախոս, գրող, թարգմանիչ և լրագրող Ասադոլլահ Ամրային:
Թարգմանիչ, գրաքննադատ, գիտաշխատող և դասախոս Աբդոլհոսեյն Ֆարզադին նշել է, որ Օտյանի հուշերը ամբողջության մեջ հայության ապրած ցավերն ու տանջանքներն են, որոնցից յուրաքանչյուրն անհերքելի մի փաստ է` օսմանցիներին դատապարտելու համար:
«Երբ մի պահ մտածում եմ, որ Ցեղասպանության ենթարկված մեկ ու կես միլիոն հայերից մի քանիսը Անդրանիկ Խեչումյանի նման մարդիկ են եղել, մեծ ցավ է պատում սիրտս: Ու շատ եմ ցավում, որովհետև միշտ մտածում եմ, որ բոլոր հայերն Անդրանիկի նման են»,- ասել է գրող, դրամատուրգ, սցենարիստ Աբբաս Ջահանգիրյանը:
«Օսմանցիները հավատացած էին, թե ով ապրում է իրենց իշխանության ներքո, կամ թուրք է, կամ պիտի ընդունի, որ թուրք է: Եվ այսօր էլ քրդերի վիճակը Թուրքիայում գրեթե նույնն է, ինչ «Անիծյալ տարիներ» գրքում հիշատակում է Օտյանը հայերի մասին: Այսինքն, երբ ասում են Թուրքիա, նկատի ունեն, որ այնտեղ ապրողները, բոլորն անխտիր, թուրք են», – շնորհանդեսին ասել է դրամատուրգ, թարգմանիչ և ռեժսոր Ասղար Նուրին:
Միջոցառման ընթացքում, իրավաբան Ժոզեֆ Ամիրյանը համառոտ կերպով ներկայացրել է իրանահայ հասարակական գործիչ Արամայիս Միրզախանյանի կենսագրականը, ում հիշատակին էր հրատարակվել գիրքը: Ծրագրի ավարտին հյուրերը ստորագրել են օրվան նվիրված հատուկ պաստառը:
Իրանահայ ժողովրդավարական ուժերի համադրող մարմինը կյանքի է կոչվել և հովանավորվում է Թեհրանի Հայ մարզամշակութային «Րաֆֆի» համալիրի, Իրանահայ ազգային եւ մշակութային միության, Աշխարհատեսների հայկական կենտրոնի, անկախ մտավորականների, «Իրանահայեր» լրատվական կայքէջի եւ «Արաքս» շաբաթաթերթի կողմից:

Hayernaysor.am