Դինքի սպանության գործը քննող թուրք դատախազի նկատմամբ քննություն է սկսվել

Պոլսահայ լրագրող, «Ակօս» թերթի խմբագիր Հրանտ Դինքի սպանության գործը քննող դատախազ Գյոքալփ Քյոքչուի նկատմամբ ծառայողական քննություն է սկսվել՝ «մամուլին տեղեկություններ տրամադրելու» մեղադրանքով, գրում է Demokrat Haber-ը։

Հենց Քյոքչուն է Ոստիկանության հետախուզության նախկին պետ Էնգին Դինչի դեմ մեղադրական եզրակացություն ներկայացրել։

Ծառայողական քննությունն սկսել է Թուրքիայի դատավորների ու դատախազների բարձրագույն կառույցը:
Քյոքչուին նաև մեղադրում են առանց դատախազության թույլտվության ձերբակալություններ իրականացնելու համար:

Համաձայն տարածված տեղեկությունների՝ դատախազ Քյոքչուից կարող են վերցնել Դինքի սպանության գործի քննությունը։

Հիշեցնենք, որ Գյոքալփ Քյոքչուի կողմից պատրաստված մեղադրական եզրակացությունը ներկայացվել էր Ստամբուլի գլխավոր դատախազությանը։ Մեղադրական եզրակացության մեջ Տրապիզոնի ոստիկանության հետախուզության նախկին պետ Էնգին Դինչի, սպանության ժամանակաշրջանում Տրապիզոնի ոստիկանապետ Ռեշեթ Ալթայի և այդ ժամանակահատվածում Ստամբուլի ոստիկանության հետախուզության բաժնի պետ Ահմեթ Իլհան Գյուլերի նկատմամբ կանխամտածված սպանությանն աջակցություն ցուցաբերելու մեղադրանքով 20-25 տարվա ազատազրկում է պահանջվում։

Դինքը սպանվել է 2007 թվականի հունվարի 19-ին։

http://www.tert.am/am/news/2015/11/11/kokcu/1841951