Եւրոպայից հայ դիտորդներ երեք անգամ մասնակցել են Թուրքիայում տեղի ունեցած ընտրություններին: ՀՅԴ Եւրոպայի Հայ դատի հանձնախմբի հաղորդակցության պատասխանատու Պետո Դեմիրճյանն «Արեւելքի» հետ զրույցում ասաց, որ 2014 թվականին Հայ Դատի եւրոպական գրասենյակն առաջին անգամ Խաղաղություն եւ ժողովրդավարություն (BDP) կուսակցության հրավերով Թուրքիայում տեղական ինքնակառավարման ընտրություններին հնարավորություն է ստացել դիտորդական առաքելություն իրականացնել Վանում: Հայերը երկրորդ անգամ իբրեւ դիտորդ Թուրքիայում ընտրություններին ներկա են գտնվել այս տարվա հունիսին, իսկ նոյեմբերի 1-ին ՀՅԴ Եւրոպայի Հայ դատի հանձնախմբի անդամները կրկին հնարավորություն են ունեցել դիտորդական առաքելություն իրականացնել խորհրդարանական արտահերթ ընտրությունների առթիվ:
Ինչպես նշեց Պետո Դեմիրճյանը, շատերի պես իրենց համար նույնպես անակնկալ էին ընտրության արդյունքները. «Ըստ էության, նախագահ Էրդողանն ամեն օր սահմանադրությունը խախտելով, երկրում քրդերի դեմ պատերազմ սկսելով, ընդդիմության դեմ հալածանքները սաստկացնելով, հաջողությամբ իշխող կուսակցության քվեները ետ խլեց եւ հնարավորություն ստացավ կազմել կառավարություն»:
Պետո Դեմիրճյանը լարված որակեց Թուրքիայի ընտրական մթնոլորտը` նշելով, որ ընդդիմադիր ընտրազանգվածը վախի մթնոլորտում էր, քանի որ իշխող կուսակցության եւ պետության բոլոր միջոցները գործի դրված էին: Նա հիշեցրեց Թուրքիայի ընտրական մթնոլորտի մասին եւրոպական քաղաքական շրջանակներում տարածված «ժողովրդավարական բռնատիրություն» արտահայտությունը` ավելացնելով, որ անձամբ է ականատես եղել դրա գործադրմանը: Մեր զրուցակիցը նաեւ հայտնեց, որ հունիսին հայ պատվիրակությանը Թուրքիայում պատշաճորեն են ընդունել, մինչդեռ նոյեմբերի 1-ին հայ դիտորդների հանդեպ ոստիկանության կողմից դժվարություններ են հարուցվել, եւ թշնամական վերաբերմունք է ցուցաբերվել: «Դժբախտաբար, Թուրքիայում ժողովրդավարական գործընթացների առումով առաջիկայում իրավիճակը բարելավելու ոչ մի հեռանկար չեմ տեսնում, քանի որ այդ առումով ոչ մի ցուցմունք չկա»,-եզրակացրեց Թուրքիայի ընտրություններին ներկա գտնված հայ դիտորդը:
http://www.arevelk.am/am/content/8/432
Leave a Reply