Թուրք ազգայնականներին չեն ընտրել անգամ իրենց կուսակիցները

Թուրքիայի Ազգայնական շարժում կուսակցության կենտրոնական շտաբը 30 հոգանոց թիմ է կազմել ու փորձում է գտնել ընտրությանը չմասնակցած կուսակցականներին, գրում է «Միլլիյեթը»։

Նոյեմբերի 1-ին Թուրքիայում կայացած խորհրդարանական ընտրություններում հունիսի 7-ի ընտրություններից ավելի քիչ ձայն հավաքած Ազգայնական շարժումը փորձում է հասկանալ տապալման պատճառները։

Այդ նպատակով ստեղծված խումբը զեկույց է պատրաստելու։ Նրանք այժմ մեկ առ մեկ ստուգում են կուսակցականներին ու պարզում, թե նրանցից ով չի գնացել ընտրատեղամաս՝ պարտքը կատարելու։

«Քվեատուփից խուսափածների» նկատմամբ հարկ եղած պատժիչ գործողություններ են իրականացվելու։

Հիշեցնենք, որ Արդարություն և զարգացում կուսակցությունը միայնակ կառավարություն ձևավորելու իրավունք է ստացել։ Թուրքիայում խորհրդարանական ընտրություն էր տեղի ունեցել նաև հունիսի 7-ին: Այդ ժամանակ Թուրքիայի խորհրդարան էին անցել 4 կուսակցություններ, այդ թվում՝ երկրի օրենսդիր մարմնում լինելու հնարավորություն առաջին անգամ ստացել էր քրդամետ Ժողովուրդների դեմոկրատիա կուսակցությունը: Այդ ընտրության ընթացքում իշխող Արդարություն և զարգացում կուսակցությունը չէր կարողացել ստանալ ձայների մեծամասնությունն ու միայնակ կառավարություն ձևավորել:

http://www.tert.am/am/news/2015/11/06/bahceli/1837343