Թուրքիայի իշխող Արդարություն և զարգացում կուսակցության (AKP) հաղթանակն այժմ բաց է թողնում հարցը, թե ինչպես AKP-ն կղեկավարի խորապես մասնատված երկիրը, գրում է Deutsche Welle-ն:
Կիրակի օրվա ընտրություններն AKP-ին տվեցին խորհրդարանի 550 տեղից 317-ը՝ արդյունավետորեն հետ բերելով հունիսի ընտրությունների կրած կորուստները, երբ կուսակցությունը 13 տարվա մեջ առաջին անգամ կորցրեց իր մեծամասնությունը։ Երբ կոալիցիա կազմելու շուրջ բանակցությունները տապալվեցին՝ AKP-ն նոր ընտրություններ նախաձեռնեց։
Նախագահ Ռեջեփ Թայիփ Էրդողանի կուսակցությունը կարողացավ ապահովել մեծամասնությունն այն ուղերձի հիման վրա, որ կոալիցիոն կառավարությունը կբերի տնտեսական և քաղաքական անկայունության:
Վատթարացող անվտանգության միջավայրը և խորը բևեռացումը վերահաս տնտեսական խնդիրների հետ միասին լուրջ հարցեր են առաջացնում առ այն, թե ինչպես է AKP-ն ղեկավարելու այժմ, երբ Էրդողանն ու իր կուսակցությունը ստացան այն, ինչ ցանկանում էին ընտրատեղամասերում:
Ստամբուլի Քադիր Հաս համալսարանի դոցենտ Աքին Ունվերի կարծիքով՝ AKP-ն կշարունակի իշխել բևեռացման ձևով:
«Եթե նրանք հաղթել են բևեռացման միջոցով, ներկուսակցական շարժիչ ուժն ի վերջո նրանց կուղղի դեպի նույն մոտեցումը»,- ասել է նա:
Անկարայում German Marshall Fund-ի տնօրեն Օզգուր Ունլուհիսարչիքլըի խոսքով՝ AKP-ն կփորձի համախմբել իշխանությունը և կզբաղվի սոցիալական և տնտեսական խնդիրներով: Գեզիի ցույցերի և խոշոր կոռուպցիոն սկանդալի միջով անցնելը կուսակցությանը որոշակի «ինքնավստահություն» կտա մտածելու, որ իր իշխանությանը ոչինչ չի սպառնում։ Այնուամենայնիվ, նա նշել է, որ շատ բան կախված կլինի Էրդողանի և վարչապետ Ահմեթ Դավութօլուի միջև ուժերի հավասարակշռությունից:
«Էրդողանը կարող է այլ օրակարգ ունենալ, և նա կարող է փորձել պնդել ուժը համախմբելու հարցում»,- ասել է նա՝ նկատի ունենալով Թուրքիայում նախագահական համակարգ հաստատելու Էրդողանի ցանկությունները:
Ինչպես գրում է Deutsche Welle-ն, AKP բարձրաստիճան պաշտոնյաներն ընտրություններից օրեր անց ասացին, որ իրենց առաջին նպատակներից մեկը սահմանադրության փոփոխություններն են և խորհրդարանական համակարգից նախագահական համակարգի անցումը։
Հիշեցնենք, որ Արդարություն և զարգացում կուսակցությունը միայնակ կառավարություն ձևավորելու իրավունք է ստացել։ Թուրքիայում խորհրդարանական ընտրություն էր տեղի ունեցել նաև հունիսի 7-ին: Այդ ժամանակ Թուրքիայի խորհրդարան էին անցել 4 կուսակցություններ, այդ թվում՝ երկրի օրենսդիր մարմնում լինելու հնարավորություն առաջին անգամ ստացել էր քրդամետ Ժողովուրդների դեմոկրատիա կուսակցությունը: Այդ ընտրության ընթացքում իշխող Արդարություն և զարգացում կուսակցությունը չէր կարողացել ստանալ ձայների մեծամասնությունն ու միայնակ կառավարություն ձևավորել:
http://www.tert.am/am/news/2015/11/04/turkey/1835378
Leave a Reply