Թուրքիայի հարավարևելյան քրդաբնակ Մարդին նահանգի Նուսայբին շրջանում ընդամենը 1 շաբաթ առաջ բացված Ահմեթ Բայհանի անվան քրդերեն ուսուցմամբ դպրոցը փակվել է պետական իշխանությունների կողմից: Ինչպես հաղորդում է թուրքական ընդդիմադիր «Posta» լրատվականը, դպրոցը փակվել է Թուրքիայի կրթության նախարարության նահանգային վարչության հրահանգով:
Իսկ որպես դպրոցի փակման պատճառ նշվել է այն փաստարկը, թե կրթօջախը բացվել է առանց համապատասխան թույլտվության:
Նշյալ դպրոցը բացվել էր «Կրթության և գիտության աշխատողների արհմիության» (Eğitim-Sen) Նուսայբինի մասնաճյուղի և «Խոսիր քրդերեն» (Kürdi-Der) միության ջանքերով: Արհմիության` Նուսայբինի մասնաճյուղի ղեկավար Քադրի Բայսալը կատարվածը որակել է որպես մարդու իրավունքների կոպիտ խախտում, ինչն ըստ էության ուղղված է մայրենի լեզվի (տվյալ դեպքում քրդերենի-խմբ.) դեմ:
Դպրոցի տնօրինությունը փակման գործընթացն արգելելու հույսով դիմել է ոստիկանություն, բայց` ապարդյուն: Կրթության նախարարության նահանգային վարչության աշխատակիցները դադարեցրել են դպրոցի աշխատանքները և կապարակնիք դնելով` հեռացել:
Ermenihaber.am
Leave a Reply