Հալեպում արաբերենով լույս է տեսել Նիկոլայ Հովհաննիսյանի աշխատությունը՝ նվիրված Հայոց ցեղասպանությանը

Այս տարի ոչ միայն Հայաստանում, այլև ամբողջ աշխարհում լայնորեն նշվում է Հայոց ցեղասպանության հարյուրերորդ տարելիցը: Տարբեր երկրներում գումարվում են դրան նվիրված գիտաժողովներ, հրատարակվում գրքեր ու հոդվածներ, կանգնեցվում հուշարձաններ և այլն: Դրանցից անմասն չմնացին նաև արաբական երկրները: Հիշենք թեկուզ մայիս ամսին Իրաքի մայրաքաղաք Բաղդադում գումարված արաբական տարբեր երկրների գիտնականների, հասարակական-քաղաքական գործիչների, հոգևոր առաջնորդների համաժողովը, որը համարվեց կարևոր իրադարձություն:
Ինչպես տեղեկանում է «Հայերն այսօր»-ը` ՀՀ Գիտությունների ազգային ակադեմիայի Արևելագիտության ինստիտուտից, օրերս Հալեպում արաբերենով լույս տեսավ պատմական գիտությունների դոկտոր, ՀՀ ԳԱԱ թղթակից անդամ, Հայաստանի գիտության վաստակավոր գործիչ, արաբագիտական հայկական դպրոցի հիմնադիր, միջազգային մեծ ճանաչում ունեցող բազմավաստակ գիտնական Նիկոլայ Հովհաննիսյանի «Հայոց ցեղասպանությունը արաբական պատմագիտության քննական լույսի ներքո (Հայոց ցեղասպանության և արաբների կախաղան հանման հարյուրամյակի կապակցությամբ. 1915-2015 թթ.)» մենագրական ուսումնասիրությունը:
Աշխատությունը հայերենից արաբերեն է թարգմանել և հրատարակել այդ բնագավառում մեծավաստակ մտավորական Ալեքսանդր Քեշիշյանը: Հարկ է նշել, որ վերնագրի մեջ «արաբների կախաղան հանման» բառերը թարգմանչի հավելումն են, որն արվել է` նկատի առնելով այն հանգամանքը, որ երիտթուրքերը ծրագրել էին ցեղասպանության ենթարկել նաև արաբներին, և երիտթուրքական եռապետության անդամ Ջեմալ փաշայի հրամանով 1915-1916 թթ. Դամասկասում, Հալեպում, Բեյրութում, Ալեյում և Երուսաղեմում կախաղան հանվեց արաբական քաղաքական էլիտան:
Պրոֆեսոր Նիկոլայ Հովհաննիսյանը հայտնի անուն է արաբական աշխարհում: Նա բազմիցս եղել է արաբական երկրներում, հանդիպումներ ունեցել Իրաքի, Սիրիայի, Լիբանանի նախագահների, Եգիպտոսի, Հորդանանի, Լիբիայի, Ալժիրի, Պաղեստինի բարձրաստիճան ղեկավարների, քաղաքական-հասարակական գործիչների, գիտնականների հետ, գիտական զեկուցումներով հանդես եկել արաբական երկրների տարբեր համալսարաններում, գիտական կենտրոններում և այլն: Նրա տասնյակ աշխատություններ՝ մենագրություններ և հոդվածներ, արաբերենով հրատարակվել են Բեյրութում, Բաղդադում, Կահիրեում, Դամասկոսում, Հալեպում, Քուվեյթում և այլն, այդ թվում՝ «Արաբական պետությունների պատմությունը (VIIդ.-2005 թ.)» քառահատոր կոթողային աշխատությունը՝ նույն Ալեքսանդր Քեշիշյանի թարգմանությամբ, որի նմանն անգամ իրենք՝արաբները չունեն:
Պրոֆեսոր Նիկոլայ Հովհաննիսյանի գիտական ղեկավարությամբ արաբական երկրների մոտ մեկ տասնյակ գիտնականներ են պաշտպանել իրենց գիտական թեզերը և ստացել դոկտորի գիտական աստիճան:
Պետք է նշել նաև, որ շատ մեծ է հայ գիտնականի վաստակը Հայոց ցեղասպանության ուսումնասիրության բնագավառում: Պրոֆեսոր Նիկոլայ Հովհաննիսյանը հեղինակն է Հայոց ցեղասպանության մոտ 130 աշխատությունների, այդ թվում` 30 մենագրական ուսումնասիրությունների՝ հրատարակված աշխարհի 15 լեզուներով ԱՄՆ-ում, Անգլիայում, Գերմանիայում, Ռուսաստանում, Թուրքիայում, Իրանում, Հունգարիայում, Ճապոնիայում, Կորեայում, Ռումինիայում և, բնականաբար, նաև արաբական երկրներում:
Հաշվի առնելով Ալեքսանդր Քեշիշյանի մեծ վաստակը հայ պատմաբանների աշխատությունները արաբերեն ներկայացնելու գործում` ՀՀ ԳԱԱ Արևելագիտության ինստիտուտը 2011 թ. նրան պարգևատրել է շնորհակալագրով, իսկ 2012 թ. նա Հայաստանի Հանրապետության Նախագահ Սերժ Սարգսյանի հրամանագրով պարգևատրվել է Մովսես Խորենացու մեդալով:

Hayernaysor.am