Ռոտերդամի համալսարանի թուրք ռեկտորը քրդերին «շուն» է անվանել

Ռոտերդամի Իսլամական համալսարանի՝ ազգությամբ թուրք ռեկտոր Ահմեդ Աքգունդուզը, որը հայտնի է հակահայ հայտարարություններով, կրկին սկանդալի կենտրոնում է հայտնվել քաղաքական հակառակորդների դեմ հարձակումների պատճառով:

Աքգունդուզը հայտարարել է, որ աղոթում է նրանց համար, ովքեր կանգնած են Անկարայում տեղի ունեցած հարձակումների հետեւում, իսկ քրդերին «շուն» է կոչել:
Ըստ Nltimes-ի, սա առաջին դեպքը չէ, երբ ռեկտորն այդպիսի արտահայտություններ է անում: Հունիսին Թուրքիայում անցկացված ընտրություններից առաջ նա թուրքերին կոչ էր արել քվեարկել Էրդողանի Արդարություն եւ զարգացում կուսակցության օգտին: «Մի քվեարկեք նույնասեռականների եւ հայերի օգտին»,- այն ժամանակ գրել էր Աքգունդուզը:

Ռեկտորի Twitter-յան այս գրառումները զայրացրել են հոլանդացի քաղաքական գործիչներին: Մասնավորապես, Ազատության եւ ժողովրդավարության ժողովրդական կուսակցությունից պատգամավոր Փիթեր Դյուսենբերգը հայտարարել է, որ այսպես չի կարող շարունակվել: Նա նշել է, որ չի կարողանում հասկանալ, թե ինչպես կարող է Աքգունդուզը ղեկավարել մի ինստիտուտ, որտեղ հոլանդացի ուսանողներ են սովորում:

Այս տարվա հուլիսին Նիդեռլանդների խորհրդարանի Ստորին պալատը խնդրել էր հետ կանչել համալսարանի հավատարմագրումը: Սակայն համապատասխան մարմինը տեղեկացրել էր, որ դրա համար հիմքեր չի տեսնում:

http://news.am/arm/news/291939.html