Ստամբուլում «Իսլամական պետության» «մանկական» ճամբար է հայտնաբերվել

Ստամբուլում հայտնաբերվել է «Իսլամական պետություն» ահաբեկչական խմբավորման ուսումնավարժական ճամբար, որտեղ անչափահասներին դասավանդել են ԻՊ-ի փիլիսոփայությունն ու սկզբունքները, սովորեցրել՝ ինչպես ապրել «Իսլամական պետություն»-ում:

Ինչպես գրում է Hurriyet Daily News-ը` հղում անելով Vatan թերթին, հոկտեմբերի 18-ին Ստամբուլի Փենդիք և Բաշաքշեհիր թաղամասերում գտնվող բնակարաններում ԻՊ-ի հետ կապեր ունենալու կասկածանքով ձերբակալվել է ավելի քան 50 մարդ՝ ուզբեկներ և տաջիկներ, որոնցից 24-ը՝ երեխաներ:
Օգոստոսին «Ալ-Կաիդա» խմբավորման ճյուղ հանդիսացող՝«Ուզբեկստանի իսլամական շարժումը», որը տեղակայված է Աֆղանստանի հետ սահմանին, հայտարարել է ինքնալուծարման և ԻՊ-ի հետ ձուլվելու մասին: Ուզբեկստանի հետախուզության աղբյուրների համաձայն՝ ավելի քան 5 հազար ուզբեկ վարձկան կռվում են Սիրիայում՝ ԻՊ-ի շարքերում:
«Իսլամական պետության» ուսումնավարժական կենտրոնը հայտնաբերվել է հոկտեմբերի 10-ին Անկարայում տեղի ունեցած և 102 կյանք խլած ահաբեկչական գործողությունից հետո: Թուրքիայի կառավարությունը հայտարարել է, որ պայթյունների գլխավոր կասկածյալը «Իսլամական պետություն»-ն է:
***
2014թ. սեպտեմբերի 5-ին՝ ՆԱՏՕ-ի գագաթաժողովի ժամանակ, ԱՄՆ պետքարտուղար Ջոն Քերին հայտարարել էր «Իսլամական պետության» դեմ միջազգային կոալիցիայի ստեղծման մասին: 2014թ. սեպտեմբերի 11-ին կոալիցիայի կազմի մեջ մտան Սաուդյան Արաբիան, Բահրեյնը, Հորդանանը, ԱՄԷ-ն, Կատարը, սեպտեմբերի վերջին՝ մի շարք եվրոպական երկրներ:
Օգոստոսի 25-ին «Իսլամական պետության» դեմ ԱՄՆ-ի գլխավորած կոալիցիային միանալու մասին է հայտարարել Թուրքիայի արտգործնախարար Մևլութ Չավուշօղլուն: Նա տեղեկացրել է, որ ավարտին են հասցվել ԱՄՆ-ի հետ տեխնիկական բանակցությունները, և համաձայնագիր է ստորագրվել: Չավուշօղլուի խոսքով՝ «Իսլամական պետության» դեմ «համապարփակ» օդային օպերացիա է սկսվելու:
Օգոստոսի վերջին միջազգային կոալիցիային միանալու խնդրանքով ԱՄՆ-ը դիմել է Ուզբեկստանին՝ նշելով, որ կենտրոնասիական այդ պետությունը ազատ է ընտրել՝ ինչ ներդրում կատարել ահաբեկիչների դեմ պայքարին:
Սեպտեմբերի վերջին ռուսական ռազմաօդային ուժերը Սիրիայում՝ Լաթաքիայի ռազմակայանից, հասցրել են առաջին օդային հարվածները «Իսլամական պետության» դիրքերին:

http://civilnet.am/2015/10/20/isil-child-training-camp-discovered-istanbul/#.VidR0Oztmko