Դավութօղլուն եւ Մերկելը քննարկել են Հայոց ցեղասպանության թեման

Թուրքիայի վարչապետ Ահմեդ Դավութօղլուն նախօրեին Գերմանիայի կանցլեր Անգելա Մերկելի հետ հանդիպման ժամանակ անդրադարձել է նաեւ Հայոց ցեղասպանության թեմային։

Թուրք վարչապետն, անդրադառնալով Բունդեսթագում քննարկման դրված Ցեղասպանության մասին բանաձեւի նախագծին, նորից խոսել է պատմաբանների հանձնաժողով ստեղծելու անհրաժեշտության մասին, տեղեկացնում է Գերմանիայի կառավարության պաշտոնական կայքը։

«Մենք անդրադարձել ենք նաեւ 1915թ. վերաբերող թեմաներին եւ այն նախագծին, որն այդ կապակցությամբ դրվել է Բունդեսթագի քննարկմանը։ Ես նշել եմ, որ այդ թեմաներն իրականում պետք է քննարկվեն ակադեմիական մակարդակով՝ հատուկ հանձնաժողովում, որի կազմում պետք է լինեն նաեւ գերմանացի պատմաբաններ։ Ես ուզում եմ եւս մեկ անգամ ներկայացնել թուրքական կողմի դիրքորոշումը. Գերմանիան եւ Թուրքիան Առաջին համաշխարհային պատերազմում նույն կողմում էին կռվում, եւ այս հարցում նրանք պետք է պատմաբանների հանձնաժողովի կազմում այլ գիտնականների հետ ներկայացված լինեն, որպեսզի քննարկեն այդ հարցը։ Մենք պատրաստ ենք այդ հարցում ցանկացած օգնություն ցուցաբերել։ Մենք ուզում ենք հայերի հետ պատմական հաշտեցման հասնել եւ պատրաստ ենք ցանկացած համագործակցության»,- ասել է Դավութօղլուն։

Անգելա Մերկելն իր  հերթին շնորհակալություն է հայտնել հայ-թուրքական հաշտեցման հարցում Դավութօղլուի առաջարկի համար եւ նշել, որ, իր կարծիքով, իրենք կարող են շարունակել ակտիվորեն աշխատել միասին։

http://news.am/arm/news/291460.html