Ինչու՞ Մերկելի այցը Թուրքիա չէր կարող սպասել մինչեւ ընտրությունների կայանալը

Գերմանիայի կանցլեր Անգելա Մերկելը կիրակի այցելելու է Թուրքիա՝ նախագահ Ռեջեփ Թայիփ Էրդողանի հետ հանդիպելու համար։ Ինչու՞ է Գերմանիայի կանցլերը Թուրքիա մեկնում խորհրդարանական ընտրությունների քարոզարշավի ամենաթեժ պահին։ Գերմանական Südeutsche Zeitung պարբերականում այս հարցին է անդրադարձել թուրք լրագրող Յավուզ Բայդարը։

Հեղինակը նշում է, որ գերմանական ընդդիմությունը զարմացած է կանցլերի նման որոշումից։ «Հենց որ Մերկելը կիրակի վայրէջք կատարի Անկարայում, նա դրանով հստակ  քաղաքական ազդակ կուղարկի թուրք հասարակությանը՝ անկախ նրանից, թե ինչպիսի  բարի նպատակներով է նա դա անում կամ թե ինչպիսի դրական լույսի ներքո նրա թիմը սա կներկայացնի։ Մերկելի այցը Թուրքիայի նախագահի քաղաքականության քննադատների համար կնշանակի մեկ բան. Մերկելը  կանգնած է Ռեջեփ Թայիփ Էրդողանի թիկունքում»,- գրում է լրագրողը։

Հոդվածագիրը հիշեցնում է, որ Թուրքիայի նախագահի համար հիմա խորհրդարանական ընտրությունների քարոզարշավի ամենաթեժ պահն է. մինչ  նոյեմբերի 1-ը մի քանի օր է մնացել։ «Ուստի կանցլերի այցելությունը չի կարող ո՛չ քաղաքական առումով չեզոք այց համարվել, ո՛չ էլ երկու առաջնորդների առօրյա հանդիպում, որի նպատակը փախստականների խնդիրը քննարկելն է։ Այս այցով Բեռլինը խորհրդանշական կերպով հրաժարվում է էրդողանի նկատմամբ իր կոշտ վերաբերմունքից, որը երկար ժամանակ գերմանական կողմը պահում էր Թուրքիան  ավտորիտար պետության վերածելու Էրդողանի քաղաքականության պատճառով։ Մինչ հիմա Բեռլինը Էրդողանից պահանջում էր փոխել կուրսը, կիսել եվրոպական արժեքները եւ հարգել սեփական քաղաքացիների իրավունքները։ Ինչու՞ Մերկելը չսպասեց առնվազն գոնե մինչեւ նոյեմբերի 1-ը»,- հարցադրում է անում հեղինակը։

Փորձը ցույց է տալիս, որ Արդարություն եւ զարգացում կուսակցությունը այս այցը կօգտագործի որպեսզի Մերկելին ներկայացնի իբրեւ Էրդողանի համախոհ եւ նրա վարած քաղաքականության կողմնակից։ Սրանով Գերմանիան կարող է կորցնել Թուրքիայում մնացած անկախ լրագրողների, ընդդիմադիրների, քրդերի, ալավիների եւ առհասարակ Էրդողանի բռնակալ ռեժիմի դեմ արտահայտվող բոլոր մարդկանց համակրանքը, եզրափակում է հոդվածագիրը։

http://news.am/arm/news/291246.html