Թուրքիայում հրապարակվել են նախընտրական սոցհարցումների արդյունքները

Թուրքական «Metropoll» սոցիոլոգիական հետազոտությունների կազմակերպությունը հրապարակել է Թուրքիայում տեղի ունենալիք արտահերթ խորհրդարանական ընտրությունների թեմայով կատարված սոցհարցումների արդյունքները:

Համաձայն հարցումների արդյունքների` կառավարող «Արդարություն և զարգացում կուսակցությունը» (ԱԶԿ-AKP), որը հունիսի 7-ի ընտրությունների արդյունքում ստացել էր 40.9% քվե, հավաքել է ընտրողների նախնական ձայների 42.5 տոկոսը:  

Ըստ թուրքական «Haberler.com» լրատվական կայքի` գլխավոր ընդդիմություն համարվող «Ժողովրդահանրապետական կուսակցությունը» (CHP-ԺՀԿ) հարցումների արդյունքում ստացել է 26.3% քվե` հունիսի 7-ի ընտրությունների արդյունքների համեմատ ցուցանիշը բարձրացնելով 1%-ով:

Անփոփոխ է մնացել քրդական «Ժողովուրդների դեմոկրատական կուսակցության» (HDP-ԺԴԿ) ցուցանիշը` 13%: Հարցումների արդյունքով հունիսի 7-ի ընտրություններով խորհրդարան անցած 4 կուսակցություններից միայն «Ազգայնական շարժում կուսակցությունն» (MHP-ԱՇԿ) է ձայների կորուստ արձանագրել, որի ցուցանիշը նվազել է մոտ 1%-ով:

Համաձայն սոցհարցումների վերոհիշյալ արդյունքների՝ առաջատար չորս կուսակցությունները ապագա մեջլիսում կունենան ներքոնշյալ թվով պատգամավորներ`

AKP – 261
CHP – 135
MHP – 77
HDP – 77 

Այս արդյունքները ևս մինչև այժմ իրականացրած հարցումների պես ցույց են տալիս, որ նոյեմբերի 1-ին տեղի ունենալիք ընտրություններից հետո ԱԶԿ-ն միակուսակցական կառավարություն կազմելու հնարավորություն չի ունենալու:  

Հիշեցնենք, որ հունիսի 7-ին կայացած խորհրդարանական ընտրությունների արդյունքներն իշխող կուսակցությանը զրկեցին միակուսակցական կառավարություն կազմելու հնարավորությունից: Իսկ կոալիցիա այդպես էլ չձևավորվեց և որոշում կայացվեց նոյեմբերի 1-ին արտահերթ ընտրություններ անցկացնել: 

http://www.ermenihaber.am/am/news/2015/10/16/