Թուրքական լրատվամիջոցը փորձ է արել Անկարայում տեղի ունեցած ահաբեկչությունը որևէ կերպ, թեկուզ պատմականորեն կապել հայերի հետ:
Հոկտեմբերի 10-ին Անկարայում տեղի ունեցած պայթյունները լուսաբանելիս՝ «Habertürk» լրատվական ծառայությունն անդրադարձել է 1906թ. սուլթան Աբդուլ Համիդի դեմ կատարված անհաջող մահափորձին՝ դա ներկայացնելով որպես Թուրքիայի հրապարակներում առաջին անգամ կազմակերպված պայթյուն: Լրատվականը նշում է, որ սուլթանի դեմ կազմակերպված այդ մահափորձի հետևում հայերն են կանգնած եղել, իսկ պայցթեցնելու համար նախատեսված ռումբը հենց հայերն էին պատրաստել:
Որպես մահափորձի անմիջական իրագործող, այսինքն՝ Յըլդըզ մզկիթի տարածքում ռումբը տեղադրող անձ, այն ժամանակ ձերբակալվել էր Բելգիայի քաղաքացի ոմն Չարլզ –Էդուարդ, որին թուրքական դատարանը մահապատժի էր դատապարտել, սակայն Բելգիայի պահանջով և ողջ Եվրոպայի ճնշման տակ ստիպված էր եղել արտահանձնել Բելգիային:
Հիշեցնենք, որ հոկտեմբերի 10-ին Թուրքիայի մայրաքաղաք Անկարայում խաղաղ ցույցի ժամանակ տեղի ունեցած երկու հաջորդական խոշոր պայթյունների հետևանքով շուրջ 100 խաղաղ բնակիչ է զոհվել: Կան բազմաթիվ վիրավորներ: Հայտնի է դարձել, որ պայթյուններն իրականացվել են իրենց վրա պայթուցիկ նյութեր կրած մահապարտների կողմից: Երկրում եռօրյա սուգ է հայտարարվել:
Ermenihaber.am
Leave a Reply