Թուրքիոյ քրտամէտ կուսակցութեան հալածանքը կը շարունակուի

ԵՐԵՒԱՆ, «Էրմենիհապեր».- Թուրքիոյ արտակարգ խորհրդարանական ընտրութիւններէն ամիս մը առաջ, քրտամէտ Ժողովուրդներու ժողովրդավար կուսակցութեան անդամներու ձերբակալութիւնները կը շարունակուին:

Թրքական «Ռատիքալ» թերթը գրած է, որ հոկտեմբեր 2ին Թուրքիոյ ոստիկանութեան ահաբեկչութեան դէմ պայքարի վարչութեան կողմէ ձերբակալուած 51 «կասկածելի»ներուն շարքին կան քրտամէտ կուսակցութեան նահանգային եւ շրջանային կառոյցներու ղեկավարներ: Ձերբակալուածներէն 25ը վկայութիւն տալէ ետք՝ ազատ արձակուած է, իսկ 26ը՝ բանտարկուած:

Վերջիններս կ՛ամբաստանուին «զինուած խմբաւորման անդամակցելու» կամ «պետութեան միասնականութեան եւ երկրի ամբողջականութեան սպառնալու» յանցանքներով։

Ձերբակալութեանց արշաւը շարունակուած է հոկտեմբեր 6ին, երբ առնուազն 20 «կասկածելի»ներ կալանաւորուած են Անգարայի տարածքին։

Asbarez.com