Ստամբուլի հայտնի շենքերի հայ վարպետների գործերը՝ մեկ ցուցասրահում

Քաղաքաշինության նախարարության Ճարտարապետության ազգային թանգարան-ինստիտուտում բացվել է «Մասունքներ… ծանոթ և անծանոթ Պալյանները» խորագրով ցուցահանդեսը, որում ներկայացված են Պալյան ճարտարապետական գերդաստանի վարպետների աշխատանքները՝ լուսանկարներ, գծանկարներ, նախագծեր: Քաղաքաշինության նախարարի բանակցությունների արդյունքում պատմական Կոստանդնուպոլսի շատ բարձրարժեք եւ հանրահայտ շենքերի հեղինակ Պալյանների արխիվը տեղափոխվել է Հայաստան: Aravot.am-ը Ճարտարապետության ազգային թանգարան-ինստիտուտի տնօրեն Աշոտ Գրիգորյանին խնդրեց առանձնացնել Պալյանների կերտած ամենահայտնի շինությունները: «Ամենանշանավոր աշխատանքը, որը տեսանելի է ծովածոցից, Դոլմաբահչեի պալատն է: Պալյանները կառուցել են նաեւ այլ պալատներ, մզկիթներ, դղյակներ եւ հայ համայնքի համար նախատեսված շինություններ, որոնք ուսումնասիրության կարիք ունեն»,-ասաց Աշոտ Գրիգորյանը: Նա նաեւ նշեց, որ Պալյան գերդաստանի աշխատանքների մի մասը տարբեր տարիներին հրդեհվել եւ վերափոխվել է, սակայն այն, ինչ պահպանվել է՝ Պոլսի (Ստամբուլի) ճարտարապետական դիմագիծն է ներկայացնում. «Պատմական Ստամբուլում անհնար է ամեն երկրորդ քայլափոխի չտեսնել Պալյանների ճարտարապետական գործերը»,-ասաց Գրիգորյանը: Նշենք նաեւ, որ Պալյան գերդաստանի ճարտարապետները մեծապես նպաստել են Օսմանյան կայսրության ճարտարապետության զարգացմանը: Նրանց արխիվն առաջիկայում կշարունակեն հետազոտել՝ նոր ցուցադրություն կազմակերպելու նպատակով:

Լուիզա ՍՈՒՔԻԱՍՅԱՆ

http://www.aravot.am/2015/10/05/615701/