Թուրքական ընդդիմադիր «Zaman» պարբերականի գլխավոր խմբագիր Էքրեմ Դումանլըն հրաժարական է տվել: «Radikal»-ի տեղեկատվության համաձայն՝ Դումանլըն իր հրաժարականը մեկնաբանել է հետևյալ կերպ. «Վերջին շրջանում մամուլի և իմ անձի դեմ կիրառվող անօրինական ճնշումների պատճառով տեսնում եմ, որ այլևս չեմ կարողանում իրականացնել գլխավոր խմբագրի իմ պարտականությունները»:
Ըստ աղբյուրի՝ պարզ է դարձել նաև, որ «Zaman» -ի նոր խմբագիր է նշանակվել «Cihan» լրատվական գործակալության գլխավոր տնօրեն Աբդուլհամիթ Բիլիջին: Դումանլըն Twitter միկրոբլոգի իր էջում Բիլիջիին ուղղված շնորհավորական գրառում է կատարել:
Նշենք, որ Էքրեմ Դումանլըն 1993թ.-ից «Zaman» պարբերականում աշխատել է որպես թղթակից, այնուհետև՝ խմբագիր և համակարգող: 1997-2001թթ. ուսանել է Բոստոնի Էմերսոն քոլեջում, 2001թ. ստանձնել է «Zaman»-ի գլխավոր խմբագրի պաշտոնը: Որոշ ժամանակ դասավանդել է նաև Թուրքիայի Ֆաթիհ համալսարանում: Հեղինակ է շարք գրքերի:
Դումանլըն եղել է «Medya Derneği» Հ/Կ-ի փոխտնօրեն, ինչպես նաև WAN (World Association of Newspapers)-ի անդամ է: Դումանլըն տարբեր ժամանակներում ձերբակալվել է քաղաքական շարժումների շրջանակներում:
http://www.ermenihaber.am/am/news/2015/10/06
Leave a Reply