Թուրքիայում կոտորված հայերի հիշատակին արձան տեղադրած քուրդ քաղաքապետն ազատ է արձակվել

Թուրքիայում կոտորված հայերի հիշատակին առաջին հուշարձանը տեղադրած եւ հայերի համար մի շարք օգտակար գործեր արած Դիարբեքիրի Սուրի շրջանի նախկին քաղաքապետ Աբդուլլահ Դեմիրբաշը հիվանդանության պատճառով ազատ է արձակվել։

Ինչպես տեղեկացնում է Ստամբուլի հայկական «Ակօս»-ը, Աբդուլլահ Դեմիրբաշի փաստաբանները դատաբժշկական փորձաքննությունների արդյունքները ներկայացրել են դատարանին՝ պահանջելով ազատ արձակել իրենց պաշտպանյալին՝ բուժումը դրսում կազմակերպելու համար։  Դատարանը ուսումնասիրել է դիմումը եւ վճռել փոխել խափանման միջոցը՝ բուժումը բանտից դուրս կազմակերպելու համար։

Աբդուլլահ Դեմիրբաշը ձերբակալվել էր 2015-ի օգոստոսի 8-ին՝  «անօրինական կառույցի անդամ» լինելու մեղադրանքով։

Աբդուլլահ Դեմիրբաշին ազատ արձակելու պահանջով նրա աղջիկը ինտերնետով ստորագրահավաք էր կազմակերպել՝ խնդրելով սրտացավ մարդկանց մասնակցել։

Նշենք, որ Սուրի նախկին քաղաքապետ Աբդուլլահ Դեմիրբաշը հայերենով ցուցանակ է տեղադրել Դիարբեքիրի մուտքի մոտ՝  «Բարով եկաք» գրությամբ, հրատարակել Հովհաննես Թումանյանի հեքիաթները հայերենով, Դիարբեքիրում կազմակերպել հայերենի ուսուցման դասընթացներ, Թուրքիայում Հայոց ցեղասպանության զոհերին նվիրված առաջին հուշարձանը տեղադրել ու աջակցել Դիարբեքիրի հայկական Սուրբ Կիրակոս եկեղեցու վերանորոգմանն ու հետագայում նաեւ պահպանմանը։

http://news.am/arm/news/289385.html