Այսօր ոչ մեկը չի կարող ժխտել այն պատմական փաստը, որը 1915-ին պատահել է հայ ժողովրդին՝ անկախ նրանից, թե այս կամ այն երկրում արդյո՞ք տեղի է ունեցել ճանաչման գործընթաց։ Այդ մասին, ըստ News.am-ի, հոկտեմբերի 2-ի մամուլի ասուլիսի ընթացքում հայտարարել է Հայաստանում Գերմանիայի արտակարգ եւ լիազոր դեսպան Մաթիաս Քիսլերը։
Եթե խոսենք Գերմանիայի Բունդեսթագի մասին, նշել է դիվանագետը, ապա այն անկախ մարմին է, որում շատ ակտիվ քննարկումներ են տեղի ունեցել։ Դեսպանի տեսանկյունից ամենակարեւորն այն է, որ օգտագործվել են այդ հարցի վերաբերյալ բարձր իրազեկություն ապահովելու բոլոր հնարավորությունները։ «Գերմանիայի կառավարությունը նպաստում է այն ծրագրերին, որոնք նպատակաուղղված են հայ եւ թուրք ժողովուրդների միջեւ կապերի ստեղծմանն ու ամրապնդմանը։ Թուրքիայում հասարակությունն արդեն տեղեկացված է այն մասին, թե ինչ է պատահել ձեր ժողովրդին»,-նշել է Քիսլերը։
Այն հարցին, թե ինչ է պատահել եւ ինչպես կարելի է անվանել հայ ժողովրդին պատահածը, դիվանագետը պատասխանել է․«Մենք բոլորս գիտենք, թե ինչ է տեղի ունեցել 1915 թվին։ Դուք գիտեք, որ հարցը քննարկվում է Գերմանիայում, մասնավորապես՝ Բունդեսթագում։ Դրա համար էլ ես հրաժարվեցի ավելին ասել։ Ձեր ժողովուրդն այնքան տառապանքներ է տեսել, որ կարեւոր չէ, թե այդ տառապանքներն ինչ բառով կարտահայտվեն։ Դրա համար էլ ես ընդգծել եմ, որ ամենակարեւորը միջազգային արձագանքն էր»։
Անդրադառնալով այն հարցին, թե արդյո՞ք Գերմանիայի՝ Թուրքիայի հետ կապված քաղաքական եւ տնտեսական շահերը խանգարում են, որ Գերմանիան պաշտոնապես ճանաչի Հայերի Ցեղասպանությունը, դեսպանը ասել է․ «Ես այդ փաստի մեջբերումն ավելի շուտ շահարկում կանվանեի»։
Hayernaysor.am
Leave a Reply