Թուրքիայի քրդամետ կուսակցությունը խոստացել է ընտրվելու դեպքում պետականորեն ճանաչել Հայոց ցեղասպանությունը

Անկարայում տեղի ունեցող ժողովի ընթացքում քրդամետ Ազգերի դեմոկրատիա կուսակցությունը ներկայացրել է նախընտրական ծրագիրը, տեղեկացնում է Yeni Şafak թերթի կայքը։

Կուսակցության համանախագահներ Սելահեթթին Դեմիրթաշի ու Ֆիգեն Յուքսեքդաղի կողմից ներկայացված նախընտրական ծրագրում նշվում է, որ ընտրվելու դեպքում կուսակցությունը պարտավորվում է ճանաչել Հայոց ցեղասպանությունը։
Այդ դրույթն ընդունվել է ծափահարություններով։

«Կուսակցությունը պատմության ընթացքում տարբեր ազգերի հանդեպ տեղի ունեցած ցեղասպանությունների ու կոտորածների համար պետության անունից ներողություն խնդրելու համար աշխատանքներ է իրականացնելու»,-ասել է Յուքսեքդաղը, ինչին դահլիճում հավաքվածները ծափահարություններով են արձագանքել։

Քուրդ գործիչը նշել է, որ ընտրվելու դեպքում իրենք վերացնելու են Հայաստանի տնտեսական շրջափակումն ու զարգացնելու են տնտեսական, քաղաքական ու դիվանագիտական հարաբերությունները, ինչպես նաև` առանց նախապայմանների բացելու են հայ-թուրքական սահմանը։

«Հայերի հետ բարեկամության կամուրջներ ենք կառուցելու»,-ասել է նա։

Թուրքիայում կայացած վերջին խորհրդարանական ընտրություններից հետո իշխող կուսակցությանը չէր հաջողվել մեծամասնություն դառնալ և կառավարություն ձևավորել։ Կոալիցիոն կառավարություն ստեղծելու բանակցությունները ևս ապարդյուն էին անցել։

Թուրքիայում նոյեմբերի 1-ին նոր խորհրդարանական ընտրություններ են կայանալու։

http://www.tert.am/am/news/2015/10/02/hdp/1805506