Ազգային հետախուզական կազմակերպության փաստարկը պատրիարքարանին դրամաշորթության ենթարկելու դատական գործընթացում

Մեղադրյալ Նարգինը, ով ներկայացել էր որպես կառավարության տեսուչ, և ում Թուրքիայի Հայոց պատրիարքարանը դատի էր տվել «Սանասարյան հան» անվամբ շինությունը պատրիարքարանին վերադարձնելու օժանդակության փոխարեն դրամաշորթության մեղադրանքով, հայտարարել է, որ ինքն Ազգային հետախուզական կազմակերպության նախկին անդամ է: Նա պնդել է նաև, որ տեսախցիկի ձայնագրությունները հետ են տրվել ու ջնջվել:
Ստամբուլի ծանր հանցագործությունների 16-րդ դատարանում կայացած դատավարության նիստին չի մասնակցել հայցվորը՝ Պոլսի հայոց պատրիարքի փոխանորդ Արամ Աթեշյանը: Նախկինում այլ հանցագործությունների մեղադրանքով ձերբակալված մեղադրյալ Քեմալ Թայֆուն Նարգինը դատական նիստին է բերվել: Դատարանը հայտարարել է, որ հարցաքննության նպատակով ողջ դատական նիստի ընթացքում ամբաստանյալը ձերբակալված է լինելու և ցուցմունք տալու:
«Ջիհան» լրատվական գործակալության հաղորդած տեղեկությունների համաձայն՝ ամբաստանյալ Նարգինը հիշեցրել է, որ սեպտեմբերի 15-ին արձանագրություններում տեղ է գտել իր ցուցմունքն` առ այն, որ «Սանասարյան հանի» առնչությամբ Արամ Աթեշյանը մի հյուրասիրության ընթացքում այն ժամանակվա վարչապետ Ռեջեփ Թայիփ Էրդողանի հետ է հանդիպել: Նարգինը նշել է, թե տեղյակ է եղել, որ հանդիպման ընթացքում շինությունը վերադարձնելու պահանջ է ներկայացվել, և պատմել է նաև, որ լսել է, թե Աթեշյանը սույն կառույցին վերաբերող տեղեկություններ ու փաստաթղթեր է ունեցել: Ամբաստանյալը նշել է, որ 2012 թ. մարտին հեռացվել է Թուրքիայի ազգային հետախուզական կազմակերպությունից:
Ամբաստանյալը հայտնել է, որ կառույցը ցանկացել են վերադարձնել Անկարայի ազգային հետախուզական կազմակերպությունում ծառայող իր ընկերները, և ընդգծել, որ վերադարձի դեպքում այն Հայոց պատրիարքարանի կողմից էր շահագործվելու: Նարգինը հավելել է նաև, որ որոշ աղբյուրներից իմացել է՝ եթե տունը չվերադարձվի, «վարձակալվելու է «Էգեմեն Բաղըշ»-ի կողմից և հյուրանոցի է վերածվելու»:

«4 հոգի էինք»
Նարգինը նշել է, որ իրենք մի միկրոավտոբուս ունեին, որի մասին բոլոր գրանցումները կարողացել էին ջնջել: Ամբաստանյալը պատմելով, որ հիմնադրամի տեղանք են գնացել ավտոֆուրգոնով և մեկ ավտոմեքենայով, հայտարարել է, որ ճանապարհին իրենց ուղեկցել է Ֆաթիհի ծառայողական ջոկատը: Նա նաև նշել է, որ ոստիկանություն բացել է պատրիարքարանի մուտքի արգելափակոցները, և իրենք Էրոլ և Էսմա անուններով անձանց հետ՝ 4 հոգով, ներս են մտել: Ամբաստանյալը պնդել է, որ Աթեշյանը ճանաչում է Էրոլ անվամբ անձին, և որ Աթեշյանն ինքն է իրենց վերև բարձրացրել: Նա հայտնել է, որ Աթեշյանի առանձնասենյակում տան վերաբերյալ թղթեր են պահանջել, և ընդգծել. «Ես միայն փաստաթղթերն եմ վերցրել, կարդացել, ասել, որ ճիշտ են: Մինչդեռ պարոն Էրոլն ասել է. «Լավ, մենք վերցնենք փաստաթղթերն ու զբաղվենք այս հարցով»»:
Հարցի առնչությամբ ամբաստանյալը նշել է, որ գումար վերցնելու մասին խոսք չի եղել, որ ինքը միայնակ չի այնտեղ գնացել, հեռախոսազրույց չի ունեցել, և որ գուցե Ազգային հետախուզական կազմակերպության ծառայող ոմն Էրոլն ինքն է հանդիպում ունեցել: Նարգինը պատմել է, որ միկրոավտոբուսում, որով հիշյալ վայր են գնացել, «MOBESE» տեսախցիկների ձայնագրությունները ջնջող սարք է եղել, և դուրս գալիս՝ ձայնագրությունները հետ են տվել և ջնջել: Ամբաստանյալը ցուցմունքում շեշտելով, որ այս ամենը միայնակ հնարավոր չէր անել, հայտարարել է, որ այն ժամանակ, երբ տեղի է ունեցել դեպքը, ինքն արդեն Ազգային հետախուզական կազմակերպության աշխատող չի եղել, և թարգմանելու նպատակով են իրեն տարել, քանի որ հայերեն գիտի:
Ամբաստանյալ Նարգինը պնդել է, որ ինքը միայնակ չի գնացել և որպես կառավարության տեսուչ ներկայանալով՝ գումար չի շորթել: Նա նաև շեշտել է, որ նախքան Ազգային հետախուզական կազմակերպության մեջ մտնելը ինքը դատվածություն է ունեցել և ԱՀԿ-ն էլ իմացել է դրա մասին:
Դատական նիստին դատախազը պահանջել է, որ հայցվոր Աթեշյանը և վկաները հաջորդ դատական նիստի ժամանակ պատրաստ լինեն մեղադրյալի ինքնությունը հաստատելու համար: Պահանջվել է նաև ամբաստանյալի պնդումների հիման վրա ԱՀԿ-ին գրավոր հարցմամբ պարզել, թե արդյոք վերջինս աշխատել է այնտեղ, թե ոչ:
Դատարանը որոշում է կայացրել, որ Արամ Աթեշյանն ու վկաները մեկ անգամ ևս կանչվելու են դատական նիստին, և նիստը հետաձգել է, մինչև կպարզվի, թե ամբաստանյալը մեղադրանք ներկայացվելու ժամանակահատվածում կամ դրանից առաջ արդյոք աշխատել է ԱՀԿ-ում:

ՄԵՂԱԴՐԱԿԱՆ ԱԿՏ
Մեղադրական ակտում նշվել է, որ Պոլսո հայոց պատրիարքի փոխանորդ Արամ Աթեշյանը և այն ժամանակվա վարչապետ Ռեջեփ Թայիփ Էրդողանը 2013 թ. հուլիսին տեղի ունեցած մի հյուրասիրության են մասնակցել: Շեշտվել է նաև, որ այստեղ «Սանասարյան հանը» Հայոց պատրիարքարանին վերադարձնելու հարցով Աթեշյանը առանձնազրույց է ունեցել Էրդողանի հետ, որի ընթացքում Էրդողանը խոստացել է հնարավորինս առանց խոչընդոտների իրականացնել համապատասխան գործընթացը: Նշվել է, որ այս դեպքից 3-4 օր անց պատրիարքարան է զանգահարել կասկածյալ Քեմալ Թայֆուն Նարգինը և ներկայանալով իբրև կառավարությանն առընթեր պետական սեփականության վարչության տեսուչ՝ հայտնել է, որ Աթեշյանի հետ պետք է հանդիպի, և պատրիարքարանի հասցեն է վերցրել: Նշվում է նաև, որ կասկածյալ Նարգինը այնուհետև Աթեշյանի հետ է հանդիպել, հայտնել թե կառավարությունից է եկել և որ «Սանասարյան հանի» վերադարձման որոշումն արդեն կայացված է:
Կասկածյալ Նարգինը հայտնելով, որ կալվածքի վերադարձման համար որոշ փաստաթղթեր է անհրաժեշտ ստորագրել, Աթեշյանին ստորագրել է տվել կառավարության բլանկ-փաստաթուղթը՝ «Անհապաղ, գաղտնի, ստուգվել է» վերտառությամբ, իսկ բնօրինակն էլ` իր մոտ պահել: Մեղադրական ակտում նշվել է նաև, որ կասկածյալ Նարգինը հայցվոր Աթեշյանից իբրև փաստաթղթային ծախսեր 6 հազար թուրքական լիրա է պահանջել, իսկ Աթեշյանը որոշ հարցումներից հետո հասկացել է, որ դրամաշորթության զոհ է դարձել:
Մեղադրական ակտում նշվել է նաև, որ կառավարության կողմից հաստատվել է կասկածյալի ինքնությունը, ինչպես նաև այն, որ վերջինս 9 տարբեր բանտարկություններ է ունեցել: Թեև ուսումնասիրվել են Հայոց պատրիարքարանի հեռախոսների և տեսախցիկների ձայնագրությունները, այնուհանդերձ այս դեպքի ընթացքում անհայտ պատճառով դրանք ջնջվել են: Մեղադրական ակտում արձանագրվել է, որ կասկածյալ Նարգինը հասարակական հաստատություններն ու շինությունները իբրև միջոց է օգտագործել` Հայոց պատրիարքարանից դրամ շորթելու նպատակով: Մեղադրական ակտով պահանջվում է կասկածյալ Քեմալ Թայֆուն Նարգինին «հիմնավոր դրամաշորթություն» մեղադրանքով 2-7 տարվա ազատազրկման դատապարտել:

http://www.agos.com.tr/tr/yazi/12870/patrikhane-yi-dolandirma-davasinda-mit-iddiasi
Թարգմանեց Անահիտ Քարտաշյանը
Akunq.net