Թուրքիայի ներքաղաքական սրացումները կարող են ազդել հայ համայնքի վրա. թուրքագետ

Թուրքիայում հնարավոր ներքաղաքական սրացումները կարող են անդրադառնալ նաև տեղի հայկական համայնքի վրա: Սեպտեմբերի 28-ին լրագրողների հետ հանդիպմանը նման կարծիք հայտնեց ՀՀ գիտությունների ազգային ակադեմիայի Արևելագիտության ինստիտուտի տնօրեն Ռուբեն Սաֆրաստյանը:

«Սրա մասին վկայող փաստեր էլ արդեն կան: Միայն շատ արագ կազմակերպված և համակարգված գործողությունների արդյունքում վերջերս հնարավոր եղավ կանխարգելել Ստամբուլի երեք հայկական թաղամասերի վրա Թուրքիայի իշխանությունների կողմից կառավարվող ամբոխի հարձակումը: Հիշենք նաև, որ Թուրքիայի խոշոր թերթերից մեկը՝ «Սաբահ»¬ը, որը հայտնի է երկրի իշխանությունների հետ իր կապերով, սադրիչ հոդված էր տպագրել, թե Թուրքիայում սկսված քրդական շարժման հետևում կանգնած են հայերը: Ակնհայտ է, որ սա ամբոխին սադրելու նպատակ ուներ Թուրքիաի հայ բնակչության դեմ», «Արմենպրես»ի հաղորդմամբ՝ նշեց Սաֆրաստյանը:

Նա ընդգծեց, որ մինչ այս պահը հաջողվել է խուսափել հայ համայնքի դեմ այդ ամբոխի այլանդակություններից և ագրեսիայից, սակայն չի բացառվում, որ դա կարող է իրականություն դառնալ, եթե Թուրքիայի ներքաղաքական վիճակն ավելի սրվի:

Թուրքագետը նաև կարծիք հայտնեց, որ Թուրքիան Հայաստանի հետ սահմանին սադրիչ քայլերի չի գնա: Նրա խոսքով՝ Թուրքիայի ուշադրության կենտրոնում Սիրիայում տեղի ունեցող զարգացումներն են: «Թուրքիան իր ղեկավարության ոչ լավ հաշվարկված քաղաքականության հետևանքով շատ խորը մխրճվել է բոլոր այն հակասությունների մեջ, որոնք կան Մերձավոր Արևելքում: Թուրքիան, օրինակ, շատ վատ հարաբերություններ ունի Եգիպտոսի հետ, որոնք արդեն մոտենում են թշնամական մակարդակի: Այնպես որ Թուրքիան շատ գլխացավաքներ ունի, ուստի Հայաստանի հետ սահմանին ինքնուրույն սադրիչ գործողությունների չի գնա, սակայն ես չեմ բացառում, որ կարող է անել դա Ադրբեջանի ձեռքերով»,¬ հավելեց Ռուբեն Սաֆրաստյանը:

Հարցին` հնարավո՞ր է Թուրքիան Հայաստանի դեմ սադրիչ գործողությունների գնա «Իսլամական պետություն» ահաբեկչական խմբավորման ձեռքերով, Սաֆրաստյանը պատասխանեց, որ «Իսլամական պետություն» ահաբեկչական խմբավորումը Հայաստանում գործելու հնարավորություններ չունի, քանի որ Հայաստանում չկա իսլամական ազգաբնակչություն: Նա համոզվածություն հայտնեց, որ Հայաստանի սահմանները հուսալիորեն պաշտպանված են, և «Իսլամական պետություն»-¬ից Հայաստանին անմիջականորեն սպառնացող վտանգ չի տեսնում:

Hayernaysor.am