Թուրքիայում բողոքական հոգևորականները շարունակում են սպառնալիքներ ստանալ

Քրիստոնյաների նկատմամբ ատելության դրսևորումները Թուրքիայում հազվադեպ երևույթներ չեն: Հաճախ դրանք ուղղված են բողոքական համայնքի հավատացյալների դեմ:

«Բաց դռներ» բարեգործական բողոքական կազմակերպությունը մտահոգված է Ստամբուլում 15 հոգևոր հովիվների անվտանգությամբ, որոնք օգոստոսի 27-ից սկսած պարբերաբար մահվան սպառնալիքներով հաղորդագրություններ են ստանում: Այդ հաղորդագրությունների ոճն ու բովանդակությունը վկայում են այն մասին, որ հեղինակները արմատական մահմեդականներ են:

Հովիվներից մեկը հայտնել է, որ «սմս» հաղորդագրություններ ու էլեկտրոնային նամակներ է ստացել, որոնց հեղինակները սպառնում են գլխատել իրեն: «Նրանք ասում են,որ մենք պատասխանատու ենք քրիստոնյա դարձած մյուս մահմեդականների համար, որ արդեն շատ ուշ է, և որ Ալլահի կամքով մենք պետք է գլխատվենք»,- մեջբերում է պորտալը հովվի խոսքերը:

Թուրքիայի բողոքական քրիստոնյաների ասոցացիայի տվյալներով` քրիստոնյաներն արդեն սովոր են նման սպառնալիքներին, բայց վերջին շաբաթներին դրանց թիվը զգալիորեն ավելացել է ու դրանք սկսել են համակարգային բնույթ ստանալ: Սպառնալիքները նույն աղբյուրից են ստացվում: Հաղորդագրությունների մեծ մասը մեջբերում է Ղորանի այս հատվածը. «Անիծյալը կբռնվի ու դաժանաբար կսպանվի այնտեղ, որտեղ մենք կգտնենք նրան»: Նամակներից մեկում էլ ասված է «Ձեր մահապատժի ժամանակը մոտենում է, փառք Ալլահին»:
Բացի դրանից` Թուրքիայում YouTube-ում հայտնվել է մի տեսագրություն, որը փորձում է կրոնով արդարացնել դավանափոխների սպանությունը:

Թուրքիան այն 50 երկրների շարքում է, որտեղ քրիստոնյաները ամենաշատն են հալածվում: Այդ ցանկը ամեն տարի հրապարակում է «Բաց դռներ» կազմակերպությունը: Այս երկրում քրիստոնյաների նկատմամբ հետապնդումները իրավապաշտպանները բացատրում են իսլամական ծայրահեղականությամբ ու ազգայնականությամբ, հայտնում է «Սեդմիցան»:

http://news.am/arm/news/287573.html