Կալիֆորնիայում ցուցադրվող զեյթունյան ավետարանի դատական գործն ավարտվել է

Ամերիկայի Հայ առաքելական եկեղեցու՝ 750-ամյա զեյթունյան մի Ավետարանից պոկված և ԱՄՆ-ի Փոլ Գեթթի թանգարանում ցուցադրվող էջերի համար հինգ տարի առաջ հարուցած դատական գործն ավարտվել է:

Թուրքիայում լույս տեսնող հայկական «Ակօս» թերթի համաձայն՝ Ամերիկայի Հայ առաքելական եկեղեցին սեպտեմբերի 21-ին հայտարարություն է տարածել, որով հայտնում է, որ նշված էջերը կշարունակեն ցուցադրվել կալիֆորնիական թանգարանում: Սակայն, միևնույն ժամանակ, դատարանը որոշել է, որ 1256թ. թվագրվող Ավետարանի էջերը եկեղեցու ունեցվածքի մասն են կազմում:

Արվեստի, պատմության և կրոնի տեսանկյունից անգնահատելի արժեք ունեցող այս զեյթունյան ավետարանի մյուս մասը պահպանվում է Երևանում՝ Մատենադարանում: Ենթադրվում է, որ Ավետարանի առաջին 8 էջերը պոկվել և ԱՄՆ են տարվել Հայոց Ցեղասպանության ընթացքում: Ավելի ուշ՝ 1994թ., Փոլ Գեթթի թանգարանը դրանք գնել է մի հայ ընտանիքից՝ 1.5 մլն. դոլարով: Նշենք նաև, որ 13-րդ դարի այս ստեղծագործությունը կրում է միջնադարի անվանի հայ մանրանկարիչ Թորոս Ռոսլինի ստորագրությունը:

http://www.ermenihaber.am/am/news/2015/09/22/%D4%BF%D5%A1%D5%AC%D5%AB%D6%86%D5%B8%D6%80%D5%B6%D5%AB%D5%A1/66470