ԼՂ հակամարտությունն ամենամեծ խնդիրն է տարածաշրջանային անվտանգության և զարգացման համար. Թուրքիայի ԱԳ նախարար

Ադրբեջանում գտնվող Թուրքիայի արտաքին գործերի նախարար Ֆերիդուն Սինիրլիօղլուն հայտնել է, որ «հպարտ է լինել այդ երկրում»։ Իր ադրբեջանցի գործընկերոջ հետ համատեղ ասուլիսի ժամանակ նա նշել է, որ Ադրբեջանի հետ բարեկամական և եղբայրական հարաբերությունները «բացառիկ նշանակություն ունեն», փոխանցում է ԱՊԱ գործակալությունը։

«Այս երկու երկրները ոչ միայն եղբայրներ են, այլև ռազմավարական գործընկերներ։ Մենք նաև հաճախ ենք հանդիպում միջազգային միջոցառումների շրջանակում»,- նշել է Սինիրլիօղլուն։

Թուրք նախարարը նշել է, որ հանդիպման քննարկման հիմնական թեման Լեռնային Ղարաբաղի հակամարտությունն է։

«Այդ հարցը ես դիտարկում եմ որպես ամենամեծ խնդիրը տարածաշրջանի անվտանգության և զարգացման համար։ Թուրքիան մտադիր է շարունակել ջանքեր ներդնել այդ հարցի լուծման ուղղությամբ։ Հարցի լուծումը կնպաստի տարածաշրջանում իրավիճակի կարգավորմանը։ Մենք ցանկանում ենք, որ դա հասկանան նաև այլ երկրներ և միջազգային հանրությունը»,- նշել է Սինիրլիօղլուն։

Նրա խոսքով՝ իրենք հետևում են ԵԱՀԿ Մինսկի խմբի աշխատանքին և անհրաժեշտության դեպքում քննադատում կամ հավանություն են տալիս նրա գործունեությանը։ Թուրք նախարարը նշել է, որ «հարկ է հրաժարվել այնպիսի քայլերից, որոնք կարող են իրավիճակի սրման հանգեցնել»։

http://www.tert.am/am/news/2015/09/16/turk/1791614