Թուրքիայի Դիարբեքիր քաղաքում պարետային ժամ է սահմանվել

Թուրքիայի իշխանությունները կիրակի օրը պարետային ժամ են սահմանել Թուրքիայի հարավ-արևելքում գտնվող ամենախոշոր քաղաքի՝ Դիարբեքիրի կենտրոնում: Այդ մասին հայտարարել է համանուն շրջանի նահանգապետը, գրում է РИА Новости-ն:
Ականատեսների խոսքերով՝ քաղաքի կենտրոնում կրակոցներ են լսվում: Վիրավորների մասին տվյալներ դեռ չի ստացվել:
Ավելի վաղ` կիրակի օրը, մեկ ոստիկան էր զոհվել, և մեկը` վնասվածքներ ստացել Դիարբեքիրի շրջանում տեղի ունեցած հարձակման հետևանքով:
Թուրքիայի ներքին գործերի նախարարության ևս երկու աշխատակից մահացել էր հարևան Շըրնակ շրջանում` ոստիկանական անցակետի մոտ ավտոմեքենայի պայթյունի հետևանքով, հինգ ոստիկաններ վնասվածքներ էին ստացել: Ուժայինների խոսքերով՝ հարձակումները կատարել են Քրդական աշխատավորական կուսակցության ռազմական թևի անդամները:
Հարձակումներին ի պատասխան անվտանգության ուժերը ուժային գործողություն են իրականացրել ուղղաթիռների մասնակցությամբ լեռնային շրջաններում, որտեղ թաքնվում են զինյալները: Սպանվել էր Քրդական աշխատավորական կուսակցության երկու անդամ:
Թուրքիայում իրավիճակը կտրուկ սրվել է հուլիսի 20-ին «Իսլամական պետության» կողմից Սիրիայի հետ սահմանին կազմակերպված ահաբեկչության և հարավարևելյան շրջաններում ոստիկանների սպանություններից հետո:
Ոստիկանների սպանությունների պատասխանատվությունը ստանձնել է Քրդական աշխատավորական կուսակցությունը: Ընդհանուր առմամբ վերջին մեկուկես ամսվա ընթացքում քուրդ զինյալների զոհ է դարձել 100-ից ավելի ոստիկան, զինվորական, ինչպես նաև քաղաքացիական անձինք:

(Ներկայում Դիարբեքիրում պարետային ժամը հանվել է-Ակունքի խմբագրություն):

http://www.tert.am/am/news/2015/09/13/turkey/1789172