Թուրքիայի հակաքրդական քաղաքականությունը մտահոգիչ է նաև հայության համար. Կիրո Մանոյան

Թուրքիայի իշխանությունների որդեգրած հակաքրդական քաղաքականությունը հարված է նաև Թուրքիայում ապրող մյուս ազգային փոքրամասնությունների, այդ թվում հայության վրա։ Այսօր լրագրողների հետ հանդիպմանն ասաց ՀՅԴ Հայ դատի և քաղաքական հարցերի գրասենյակի ղեկավար Կիրո Մանոյանը։

«Թուրքիայում տեղի ունեցող իրադարձությունները մտահոգիչ են, իշխանությունները իբր «իսլամական պետության» դեմ իրենց պայքարի պատրվակ օգտագործելով` սկսել են մեծ ռազմական արշավ Թուրքիայի քրդաբնակ շրջանակներում, քրդական հասարակության դեմ։ Մեզ համար հարցը մտահոգիչ է այնքանով, որ իր ազդեցությունը կարող է ունենալ մեզ վրա, մեր տարածաշրջանի վրա և Հայաստանի համար ևս դրական չէ։ Հիշո՞ւմ եք, որ տեղի ունեցած պայթյունը մեր սահմանի շատ մոտ էր, ու լարվածությունը չի նպաստում, որ տարածաշրջանը լինի կայուն»,-ասաց նա։

Ըստ Կիրո Մանոյանի` Թուրքիայի այս քաղաքականությունը հուշում է՝ նրանք ոչ մի ցանկություն չունեն Հայաստանի հետ դիվանագիտական հարաբերություններ ստեղծելու, որովհետև գնում են հասարակությունը պառակտելու ուղղությամբ։

«Հայտնի չէ, թե մինչև որտեղ են պատրաստ գնալ Թուրքիայի իշխանությունները, բայց չի կարելի բացառել, որ ավելի լայնածավալ ռազմական գործողություններ կլինեն, բայց նաև հայտնի է, թե քրդական զինված ուժերը իրենցից ինչ են ներկայացնում, դրանով էլ որոշակի սահմանափակվում են Թուրքիայի գործողությունները։

Բայց որ լարվածությունը կմեծանա` հստակ է, քանի որ կարծես այդ նպատակն են հետապնդում Թուրքիայի իշխանությունները»,-ասաց նա։

Կիրո Մանոյանն ընդգծեց, որ Թուրքիան իրականում ոչ միայն չի պայքարում «իսլամական պետություն» կազմակերպության դեմ, այլ նաև աջակցել ու շարունակում է աջակցել։ «Նաև հարվածում է այն ուժերին, որոնք պայքարում են այդ կազմակերպության դեմ»,-ասաց նա։

http://www.tert.am/am/news/2015/09/11/kiro-manoyan/1787745