Հռոմի պապը նոր հարգանքի տուրք է մատուցել Հայոց ցեղասպանության նահատակներին

Massis Post-ը հայտնում է, որ երկուշաբթի օրը Վատիկանի Սբ Մարթայի մատուռում կայացել է առավոտյան պատարագ, որին մասնակցել է Հռոմի պապ Ֆրանցիսկոսը, հայ կաթոլիկ հոգևորականության ներկայացուցիչներ` վերջերս ընտրված Գրիգոր Պետրոս 20-րդ պատրիարքի գլխավորությամբ:

Հռոմի պապը հայ կաթոլիկներին կոչ է արել հիշել ցեղասպանության իրենց նահատակներին:

Հռոմի պապը նաև վերստին հայտարարել է, որ աշխարհում ժողովուրդներին բաժին ընկած հալածանքների զոհ է նաև հայ ժողովուրդը:

Անմիջականորեն չնշելով Հայոց ցեղասպանությունը` Հռոմի պապը հիշեցրել է, որ հայերն առաջին քրիստոնյաներն են, որ նախ քրիստոնեության համար են հալածվել, ապա իրենց տներից անապատներ քշվել:

Հռոմի պապը հավելել է, որ բոլոր հավատավոր հայերի ու հոգևորականների հետ ցանկանում է հիշել հայ սրբերին ու նահատակներին, որ մահացել են սովից, ցրտից, խոշտանգումներից:

Պոնտիֆիկոսը առանձնակի նշել է բոլոր քրիստոնյաների և հատկապես՝ հայերի խիզախությունը` խոսելով նաև այսօրվա հալածանքների մասին, որ ահաբեկիչները Մերձավոր Արևելքում թույլ են տալիս քրիստոնյաների հանդեպ:

http://www.tert.am/am/news/2015/09/09/pope-tribute-armgen100/1786366