Անկարայում հիշատակել են 1955թ. սեպտեմբերի 6-7-ի իրադարձությունները

Թուրքիայի մայրաքաղաք Անկարայում կազմակերպվել է բողոքի ցույց` 1955թ. սեպտեմբերի 6-7-ին Ստամբուլում հայ, հույն և հրեա բնակչության դեմ իրականացված հարձակումների 60-րդ տարելիցի հետ կապված:

«Demokrathaber»-ի հաղորդմամբ`բողոքի ցույցին մասնակցել է Թուրքիայի գլխավոր ընդդիմադիր ուժ հանդիսացող Ժողովրդահանրապետական կուսակցության (ԺՀԿ-CHP) հայ կին պատգամավոր Սելինա Դողանը, թուրք հայտնի քաղաքագետ և հրապարակախոս Բասքըն Օրանը, քրդամետ Ժողովուրդների դեմոկրատական կուսակցության (ԺԴԿ- HDP) նախկին պատգամավոր Դեմի Չելիքը և մի շարք ակադեմիկոսներ:

Ցուցարարները իրենց ձեռքում պահել էին պաստառ, որի վրա գրված էր. «Սեպտեմբերի 6-7 ջարդերը չենք մոռացել, չենք մոռանալու»: Եղել են նաև հարձակման ենթարկված եկեղեցիների, գերեզմանների լուսանկարներ:
Նշենք, որ նմանատիպ ցույց անցկացվել է նաև Ստամբուլում, Մարդու իրավունքների միության մի շարք անդամների մասնակցությամբ:

Հավելենք, որ 1955թ սեպտեմբերի 6-ին Թուրքիայի պետական ռադիոյով հայտարարվել էր, որ Թուրքիայի Սալոնիկ քաղաքում գտնվող Թուրքիայի առաջին նախագահ Մուստաֆա Քեմալ Աթաթյուրքի հայրական տան վրա ռումբ է նետվել: Սեպտեմբերի 6-ին, կեսօրից հետո թուրքական տարբեր երիտասարդական կազմակերպություններ և գլխավորապես իշխանությունների աջակցությամբ ստեղծված «Կիպրոսը թուրքական է» միությունը Ստամբուլի Թաքսիմ հրապարակում կազմակերպում են բողոքի հանրահավաք` կապված այդ դեպքի հետ: Դրանից հետո բողոքարարները սկսում են քարեր նետել Թաքսիմին մոտ Իսթիքլյալ պողոտայում գտնվող հույներին և հայերին պատկանող խանութների վրա, իսկ կարճ ժամանակ անց հայտնվում են նախօրոք մահակներով և այլ անհրաժեշտ գործիքներով զինված խմբեր, որոնք սկսում են հարձակվել, կոտրել ու թալանել ոչ մուսուլմաններին պատկանող խանութները, արհեստանոցները, տները, դպրոցները, եկեղեցիները և անգամ գերեզմանատները: Ջարդերը չեն սահմանափակվել միայն Իսթիքլյալ պողոտայով, այլ արագորեն տարածվել են Ստամբուլի մյուս թաղամասերում` Բաքըրքյոյ, Բեյօղլու, Բեյքոզ, Բեշիքթաշ, Էմինոնյու, Էյուփ, Ֆաթիհ, Քադըքյոյ, Սարըյեր, Շիշլի, Ուսքյուդար, անգամ Ստամբուլի մոտակայքում գտնվող Մարմարա ծովի Իշխանաց կղզիներում, որտեղ բնակվում էին հույներ:

http://www.ermenihaber.am/am/news/2015/09/08/ankara-1955/65696