Թուրքիայի նախագահ Ռեջեփ Թայիփ Էրդողանի գլխավորությամբ նախօրեին գումարվել է Ազգային անվտանգության խորհրդի (ԱԽԽ) նիստ, որը տևել է շուրջ 6 ժամ:
Ինչպես հայտնում է նախագահականի պաշտոնական կայքը, նիստից հետո հրապարակված հայտարարության մեջ ասվում է, որ «Քուրդիստանի բանվորական կուսակցության» (ՔԲԿ-PKK) և «Իսլամական պետություն» (ԻՊ) ահաբեկչական կազմակերպության դեմ թուրքական անվտանգության ուժերի կողմից իրականացվող գործողությունները շարունակվելու են:
Հայտարարության մեջ նշվում է նաև, որ չի հանդուրժվելու օրենքից դուրս որևէ կազմակերպություն կամ գործողություն: Այս համատեքստում շեշտվել է նաև «զուգահեռ կառույցի» (Գյուլենական շարժում) դեմ իրականացվող պայքարը շարունակելու անհրաժեշտությունը:
Հայտարարության մեջ անդրադարձ է կատարվում նաև նոյեմբերի 1-ին Թուրքիայում անցկացվելիք արտահերթ խորհրդարանական ընտրությունների անվտանգության ապահովմանը` նշվելով, որ ժողովրդի ազատ ընտրությունն ու տեղաշարժը ապահովելու համար ձեռնարկվելու են բոլոր անհրաժեշտ միջոցառումները:
Ermenihaber.am
Leave a Reply