PKK-ի դեմ հարձակում սկսած 37 թուրք զինվոր ընկել են շրջափակման մեջ եւ սպանվել

Թուրքիայի հարավ-արեւելյան Հաքքարի նահանգում PKK-ի (Քուրդիստանի բանվորական կուսակցություն) զինյալների դեմ գործողության դուրս եկած թուրք զինվորականները մեծ թվով սպանվածներ ու վիրավորներ են տվել։

Թուրքական լրատվամիջոցների փոխանցմամբ՝ սեպտեմբերի 6-ի երեկոյան Հաքքարի նահանգի Յուքսեքօվայի շրջանի Դաղլըջա կոչվող լեռնային տեղանքում թուրք զինվորականները գործողություններ են սկսել քուրդ զինյալների դեմ։ Գործողության ժամանակ քուրդ զինյալները պայթեցրել են 2 զրահապատ մեքենա, որոնց մեջ եղել են գնդի հրամանատարը եւ 11 զինվոր։ Այս դեպքից հետո գործողության վայր են նետվում հատուկջոկատայիններ, որոնց մի մասն էլ ըստ շրջանառվող լուրերի գերի են ընկել քուրդ զինյալների ձեռքը։

Թուրքական լրատվամիջոցները խուսափում են հստակ նշել սպանված թուրք զինվորների թիվը, սակայն մի քանի լրատվամիջոց նշել էին 20 եւ 15 թվերը։ Իսկ սոցկայքերում օգտատերերը պնդում են, թե հավաստի տեղեկություններով սպանվել է 37 թուրք զինվորական եւ 12 հատուկջոկատային գերի ընկել։

http://news.am/arm/news/284926.html